လီဗာပူးအသင်းတောင်ပံကစားသမား ဆာလက်က မိမိအနေနဲ့ လက်ရှိအချိန်အထိ စာချုပ်သစ်ကမ်းလှမ်းမှုလက်ခံမရသေးကြောင်း အခိုင်အမာပြောကြားလိုက်ပါတယ်။
ဆာလက်ရဲ့စာချုပ်သက်တမ်းက နောက်ဆုံးနှစ်ထဲကိုရောက်ရှိနေပြီး အသင်းမှာဆက်နေမလား ဒါမှမဟုတ် စိန်ခေါ်မှုအသစ်တွေရင်ဆိုင်မလားဆိုတာ မသိရသေးတာဖြစ်ပါတယ်။
အီဂျစ်သားဟာ လီဗာပူးအသင်းထံ ၂၀၁၇ တုန်းကရောက်လာခဲ့တာဖြစ်ပြီး အဓိကကစားသမားအဖြစ် စွမ်းဆောင်ရည်ကောင်းတွေပြသထားနိုင်ခဲ့ကာ ပြိုင်ပွဲစုံဂိုးအများဆုံးသွင်းယူထားနိုင်တဲ့ လီဗာပူးအသင်းရဲ့ ၅ ယောက်မြောက်ကစားသမားအဖြစ် ရပ်တည်နေပါတယ်။
အသက် ၃၂ နှစ်သားဘက်ကလည်း အသင်းမှာဆက်ရှိနေချင်သလို ပရိသတ်တွေကလည်း အသင်းမှာဆက်နေဖို့ အလိုရှိနေကြပါတယ်။ ဆာလက်ဟာ အခုရာသီပြိုင်ပွဲစုံ ၁၈ ပွဲမှာ ၁၂ ဂိုးသွင်း ၊ ၁၀ ဂိုးဖန်တီးထားနိုင်ခဲ့ကာ ပြီးခဲ့တဲ့ဆောက်သမ်တန်ကို ၃-၂ နဲ့အနိုင်ရခဲ့တဲ့ပွဲမှာ အဖိုးတန်ချေပဂိုး နဲ့ အနိုင်ဂိုးတွေကို သွင်းယူပေးနိုင်ခဲ့ပါတယ်။
လီဗာပူးအနေနဲ့ ဆာလက်နေရာမှာ အစားထိုးနိုင်မယ့်သူရှာဖွေရခက်ခဲနိုင်ပြီး စာချုပ်သစ်သဘောတူညီမှုမရခဲ့ရင် လာမယ့်ဇန်နဝါရီ ၁ ရက်နေ့မှာ ပြည်ပကလပ်အသင်းတစ်သင်းနဲ့ အကြိုသဘောတူညီမှုရယူနိုင်မှာဖြစ်ကာ ရာသီအကုန်မှာ အလွတ်နဲ့ထွက်ခွာနိုင်တာဖြစ်ပါတယ်။
“ဒီဇင်ဘာထဲရောက်ပါတော့မယ်။ ကျွန်တော် အသင်းဘက်ကနေ ဘာကမ်းလှမ်းမှုမှမရသေးပါဘူး။ ကျွန်တော် ထွက်ခွာတာထက် အသင်းမှာဆက်နေချင်ပါတယ်။ ဒီအသင်းမှာ နှစ်အတော်ကြာရှိခဲ့တာကို ခင်ဗျားသိလား?။
ဒီအသင်းနဲ့တူတဲ့အသင်းမရှိပါဘူး။ ဒါပေမယ့် အဆုံးသတ်မှာ ကျွန်တော့်လက်ထဲမှာ အဲ့တာရှိမနေပါဘူး။ ကျွန်တော်အရင်ကပြောခဲ့သလိုပါပဲ။ ဒီဇင်ဘာထဲရောက်နေပါပြီ။ ကျွန်တော့်အနာဂတ်နဲ့ပတ်သက်ပြီး ဘာမှမရသေးပါဘူး။
ကျွန်တော်ပရိသတ်တွေကို ချစ်ပါတယ်။ ပရိသတ်တွေကလည်း ကျွန်တော့်ကိုချစ်ပါတယ်။ အဆုံးသတ်မှာ ဒီအရာက ကျွန်တော်တို့အားလုံးလက်ထဲမှာမရှိပါဘူး။ ဆက်လက်စောင့်ကြည့်ရပါမယ်။
မှန်ပါတယ်။ ကျွန်တော်စိတ်ပျက်မိပါတယ်။ ကျွန်တော် အနားမယူသေးသလို ဆက်ကစားဦးမှာပါ။ ဒီရာသီကိုအာရုံစိုက်နေပါတယ်။ ပရီးမီးယားလိဂ်ကော ချန်ပီယံလိဂ်ကော ရယူချင်ပါတယ်။
စိတ်ပျက်ပေမယ့် ကျွန်တော်တို့ ဆက်လက်စောင့်ကြည့်ရပါမယ်။ ကျွန်တော်က ပရော်ဖက်ရှင်နယ်ကျတဲ့သူပါ။ လူတိုင်း ကျွန်တော့်အလုပ်အပေါ်ထားတဲ့ကျင့်ဝတ်ကို မြင်နိုင်ပါတယ်။ ကျွန်တော်ဘောလုံးကစားရတာကို နှစ်သက်ပါတယ်။
ထိပ်တန်းအဆင့်နဲ့ ဖြစ်နိုင်သမျှကစားချင်ပါတယ်။ ကျွန်တော်အကောင်းဆုံးလုပ်နေပါတယ်။ ဒီအသင်းအတွက် ကျွန်တော် အကောင်းဆုံးပေးဆပ်ကစားနေပါတယ်။ နောက်ထပ်ဘာဖြစ်မလဲဆိုတာ ဆက်လက်စောင့်ကြည့်ရပါမယ်”လို့ ဆာလက်က ပြောကြားခဲ့ပါတယ်။
လီဗာပူးအသင်းပရိသတ်တွေကတော့ ဆာလက်အနာဂတ်ကို အလျင်အမြန်ဖြေရှင်းစေချင်နေကာ အသင်ဘက်ကတော့ အခုချိန်အထိ မထူးခြားသေးတာဖြစ်ပါတယ်။
လာမယ့်ကြားရက်မှာ လီဗာပူးအသင်းဟာ ချန်ပီယံလိဂ်ပွဲအဖြစ် ရီးရဲလ်အသင်းနဲ့ရင်ဆိုင်ရမှာဖြစ်ပြီး အဲ့နောက် အန်ဖီးလ်မှာ မန်စီးတီးနဲ့ရင်ဆိုင်ရမှာဖြစ်ပါတယ်။
