လီဗာပူးလ်နည်းပြ ယာဂန်ကလော့ပ်က မိမိအနေဖြင့် လီဗာပူးလ်အသင်း၏ နည်းပြထိုင်ခုံပေါ်တွင် ဆက်ရှိနေခြင်းမှာ အတိတ်ကာလစွမ်းဆောင်မှုများကြောင့် ဖြစ်သည်ဟု ဝန်ခံပြောကြားခဲ့သည်။
ယာဂန်ကလော့ပ်သည် လီဗာပူးလ်အသင်းကို ပထမဆုံး ပရီးမီးယားလိဂ်ချန်ပီယံဆုရရှိအောင် စွမ်းဆောင်ပေးနိုင်ခဲ့သူဖြစ်သလို၊ ချန်ပီယံလိဂ်ဖလား၊ FA ဖလား၊ လိဂ်ဖလား၊ ကလပ်ကမ္ဘာ့ဖလား၊ ဥရောပစူပါဖလားစသဖြင့် ဆုဖလားမျိုးစုံ ရယူပေးနိုင်ခဲ့သူလည်းဖြစ်သည်။
၎င်းသည် လီဗာပူးလ်အသင်းကို ၂၀၁၅ ခုနှစ်တွင် စတင်ကိုင်တွယ်ခဲ့ပြီး (၇)နှစ်ကျော်ကာလအတွင်း၌ ပရီးမီးယားလိဂ်တွင်သာမက ဥရောပ၏အင်အားကြီးအသင်းအဖြစ် ရပ်တည်နိုင်အောင်ပါ စွမ်းဆောင်ပေးနိုင်ခဲ့သည်။
သို့သော် ယခုရာသီတွင် ရလဒ်ဆိုးများနှင့် ရင်ဆိုင်ခဲ့ရပြီး ဖလားလက်မဲ့ရာသီ ဖြစ်ရုံသာမက ချန်ပီယံလိဂ်ဝင်ခွင့်နှင့် လွဲချော်ရမည့်အနေအထားပင် ဖြစ်နေသည်။
ထို့ကြောင့် ယာဂန်ကလော့ပ်က မိမိ လီဗာပူးလ်နည်းပြအဖြစ် ဆက်ရှိနေခြင်းမှာ အတိတ်ကာလ စွမ်းဆောင်မှုများကြောင့်ဟု ပြောကြားခဲ့ခြင်းဖြစ်သည်။
”ကျွန်တော် ဒီနေရာမှာ ထိုင်နေနိုင်တာ အတိတ်ကာလစွမ်းဆောင်မှုတွေကြောင့်ပါ။ ဒီရာသီအနေအထားကြောင့် မဟုတ်ပါဘူး။ ကျွန်တော်တို့မှာ အခြေအနေကို နားလည်သဘောပေါက်တဲ့ အသင်းပိုင်ရှင်တွေတော့ ရှိနေပါတယ်”ဟု ယာဂန်ကလော့ပ်က ပြောကြားခဲ့သည်။
လီဗာပူးလ်အသင်းသည် လက်ရှိတွင် ပြိုင်ပွဲစုံ(၃)ပွဲဆက် ရှုံးနိမ့်ထားသည်။
