ရီးယဲလ်အသင်းသည် အသင်းတိုက်စစ်ကစားသမား အဆန်စီယိုအတွက် PSG အသင်း၏ ကမ်းလှမ်းမှုကို ပယ်ချခဲ့ကြောင်း သိရသည်။ PSG အသင်းသည် ပြီးခဲ့သည့်ဇန်နဝါရီအပြောင်းအရွှေ့ဈေးကွက်နောက်ဆုံးနေ့တွင် အဆန်စီယိုအား ခေါ်ယူရန် ငွေသားဖြင့် ကမ်းလှမ်းခဲ့ကြောင်း သိရှိရသည်။
သို့သော် ရီးယဲလ်အသင်းသည် ယခုရာသီကုန်တွင်အသင်းနှင့် စာချုပ်သက်တမ်းကုန်ဆုံးမည့် စပိန်တိုက်စစ်ကစားသမား အဆန်စီယိုအတွက် ကမ်းလှမ်းမှုကို ငြင်းဆန်ပယ် ချခဲ့ခြင်းဖြစ်ကြောင်း သိရှိရသည်။ အသက် (၂၇)နှစ်အရွယ်ရှိ အဆန်စီယိုသည် အန်ဆယ်လော့တီလက်ထက်တွင် ပုံမှန်ပွဲထွက်ခွင့်ရရန် ရုန်းကန်နေရခြင်းကြောင့် ပြီးခဲ့သည့်နွေကတည်းက အသင်းမှထွက်ခွာရန် ကြိုးပမ်းခဲ့ဖူးသူဖြစ်သည်။
သို့သော် ၎င်းသည် ယခုရာသီတွင် ရီးယဲလ်အသင်းအတွက် ပြိုင်ပွဲစုံ (၂၄)ပွဲတွင် (၃)ဂိုးသွင်း ယူထားသည်။ ၎င်းအနေဖြင့် လူစားဝင်ချိန်တွင် ခြေစွမ်းပြနိုင်ခြင်းကြောင့် ရီးယဲလ်အသင်းက ရောင်းထုတ်ရန်ငြင်းပယ်ခဲ့ခြင်းဖြစ်ကြောင်း သိရသည်။
