အီတလီလက်ရွေးစင်အသင်းနည်းပြ မန်စီနီက အင်္ဂလန်အသင်းကို (၁-၂) ဂိုးဖြင့် ရှုံးနိမ့်သည့်ပွဲတွင် မိမိတို့အသင်းအနေဖြင့် သရေရခဲ့သင့်ကြောင်း ပြောကြားခဲ့သည်။
မတ်လ ၂၇ ရက်က ကစားခဲ့သည့် ယူရို -၂၀၂၄ ခြေစစ်ပွဲ အုပ်စု (C) အဖွင့်ပွဲတွင် လက်ရှိ ယူရိုချန်ပီယံ အီတလီအသင်းသည် အိမ်ကွင်းတွင် ကစားခဲ့သော်လည်း အင်္ဂလန်အသင်းအား (၁-၂) ဂိုးဖြင့် ရှုံးနိမ့်ခဲ့ရသည်။ အီတလီအသင်းသည် ပြီးခဲ့သည့် ၂၀၂၂ ကမ္ဘာ့ဖ လားပြိုင်ပွဲတွင် ခြေစစ်ပွဲမအောင်မြင်ခဲ့သဖြင့် ဝေဖန်မှုများနှင့် ရင်ဆိုင်နေရပြီး ယခုရှုံးပွဲကြောင့် ဖိအားများ ပိုတိုးလာခဲ့သည်။
ထို့ ကြောင့် အင်္ဂလန်အသင်းအား ရှုံးနိမ့်သည့် ပွဲအပြီး မန်စီနီက အီတလီကစားသမားများ ကို ကာကွယ်ပြောကြားခဲ့ပြီး မိမိတို့အသင်း အနေဖြင့် သရေရခဲ့သင့်ကြောင်း ပြောကြားခဲ့ခြင်းဖြစ်သည်။ မန်စီနီက ” ဒီပွဲက ခက်ခဲမယ်ဆိုတာကို ကျွန်တော်တို့ သိပါ တယ်။ ဒါပေမဲ့ တည်ကန်ဘောတွေကနေ ကျွန်တော်တို့ ဂိုးတွေပေးလိုက်ရတယ်။ ပထမပိုင်းက နည်းနည်းခက်ခဲခဲ့ပြီး ဒုတိယပိုင်းမှာ ကျွန်တော်တို့ ပွဲကိုစိုးမိုးနိုင်ခဲ့တယ်။ သရေရဖို့ ကျွန်တော်တို့ ကြိုးစားခဲ့ပါတယ်။ ဒီပွဲမှာ သရေရလဒ်က မျှတတဲ့ရလဒ်လို့ ကျွန်တော် ထင်ပါတယ်။ အင်္ဂလန်အသင်းက တည်ကန်ဘောတွေနဲ့ ဒုက္ခပေးနိုင်တဲ့အသင်းပါ”ဟု ပြောကြားခဲ့သည်။
အီတလီအသင်းသည် ယူရို-၂၀၂၄ အုပ်စု (C) တွင် အင်္ဂလန်၊ ယူကရိန်း၊ မြောက်မက် ဆီဒိုးနီးယား၊ မော်လ်တာအသင်းတို့နှင့်အတူ ကျရောက်နေသည်။ မန်စီနီက အဖွင့်ပွဲတွင် အင်္ဂလန်အသင်းကို ရှုံးနိမ့်ခဲ့သည့်အတွက် စိတ်ပျက်ရသော်လည်း အသင်း၏ကစားပုံ တိုးတက်လာသဖြင့် လာမည့်ပွဲများတွင် ရလဒ်ကောင်းရန် မျှော်လင့်ကြောင်း ဆိုခဲ့သည်။
