ဥရောပဘောလုံးအဖွဲ့ချုပ်(UEFA) သည် ယူရို-၂၀၂၀ ဗိုလ်လုပွဲမှ ပရိသတ်များ၏ သောင်းကျန်းမှုအတွက် အင်္ဂလန်ဘောလုံးအဖွဲ့ချုပ်ကို ကွင်းပိတ်ပြစ်ဒဏ်နှင့် ဒဏ်ငွေပြစ်ဒဏ်များ ချမှတ်လိုက်ကြောင်း သိရသည်။
အင်္ဂလန်နှင့် အီတလီတို့ ယှဉ်ပြိုင်ကစားခဲ့သည့် ယူရို-၂၀၂၀ ဗိုလ်လုပွဲ၌ ပွဲမစမီ လက်မှတ်မဲ့ အင်္ဂလန်ပရိသတ်များက ဝင်ဘလေကွင်းအတွင်း ဝင်ရောက်ရန် ကြိုးပမ်းခဲ့ကြခြင်းဖြစ်ပြီး စုံစမ်းစစ်ဆေးမှုများအရ ယင်းကဲ့သို့ ပြုမူခဲ့သည့် ပရိသတ်အရေအတွက်မှာ (၅၀၀၀)ဝန်းကျင်ရှိခဲ့ကြောင်း သိရသည်။
ယင်းအတွက် တားဆီးရန် ကြိုးပမ်းခဲ့သော ရဲတပ်ဖွဲ့ဝင်(၁၉) ဦး ဒဏ်ရာရရှိခဲ့သလို။ ပရိသတ်များစွာမှာလည်း ထိတ်လန့်တုန်လှုပ်ခဲ့ရသည်။
အဆိုပါ အကျည်းတန်ဖြစ်ရပ်အတွက် အင်္ဂလန်ဘောလုံးအဖွဲ့ချုပ်က စုံစမ်းစစ်ဆေးမှုများ ပြုလုပ်ခဲ့သလို၊ UEFA ကလည်း သီးခြားစုံစမ်းစစ်ဆေးမှုများ ပြုလုပ်ခဲ့ပြီးနောက် ပြစ်ဒဏ်ချမှတ်မှုများ ပြုလုပ်ခဲ့ခြင်းဖြစ်သည်။
UEFA က အင်္ဂလန်ဘောလုံးအဖွဲ့ချုပ်ကို ဒဏ်ငွေယူရိုတစ်သိန်း ပေးဆောင်ရန်နှင့် လက်ရွေးစင်အသင်း၏ အိမ်ကွင်း ပွဲစဉ်(၂)ပွဲကို ပရိသတ်မပါဘဲ ကွင်းပိတ်ကစားစေရန် ပြစ်ဒဏ်ချမှတ်ခဲ့သည်။
သို့သော် ကွင်းပိတ်ပြစ်ဒဏ် (၂)ပွဲအနက် တစ်ပွဲကိုသာ လတ်တလောကျခံရမည်ဖြစ်ပြီး ကျန်တစ်ပွဲကို (၂)နှစ်အတွင်း ကျခံရန် ဆိုင်းငံ့ပြစ်ဒဏ်အဖြစ် သတ်မှတ်ပေးခဲ့ကြောင်း သိရသည်။
ယခုပြစ်ဒဏ်အရ အင်္ဂလန်လက်ရွေးစင်အသင်းအနေဖြင့် လာမည့်နှစ် ဇွန်လအတွင်း ယှဉ်ပြိုင်ကစားရမည့် Nations League ပွဲစဉ်တစ်ပွဲကို ပရိသတ်မပါဘဲ ယှဉ်ပြိုင်သွားရဖွယ်ရှိကြောင်း သိရသည်။
