အက်စတွန်ဗီလာကွင်းလယ်တိုက်စစ်ကစားသမား ဂရီးလစ်ရှ် အသင်းနှင့်လေ့ကျင့်ခန်းပြန်ဆင်း

မန်စီးတီးအသင်းနှင့် သတင်းထွက်နေသည့် အက်စတွန်ဗီလာတိုက်စစ်ကစားသမား ဂရီးလစ်ရှ်သည် အသင်းတွင် လေ့ကျင့်ခန်းပြန်ဆင်းခဲ့ကြောင်း သိရသည်။ ဗီလာ အသင်း၏ Twitter ၌တင်ရှိခဲ့သည့် ဗီဒီယိုဖိုင်တွင် ဂရီးလစ်ရှ် လေ့ကျင့်ခန်းဆင်းနေမှု ပါရှိခဲ့ခြင်းဖြစ်သည်။

မန်စီးတီးအသင်းသည် ဂရီးလစ်ရှ်ကို ဗြိတိန်စံချိန်တင် ပေါင်သန်း ၁၀၀ ဖြင့် ကမ်းလှမ်းခဲ့ပြီး ယခုတစ်ပတ်အတွင်း အပြောင်းအရွှေ့အပြီးသတ်နိုင်ဖွယ်ရှိကြောင်း ဗြိတိန်မီဒီယာများက ပြီး ခဲ့သည့်ရက်ပိုင်းက ဖော်ပြခဲ့ကြသည်။

ဗီလာအသင်းကမူ ၎င်းတို့၏အကယ်ဒမီထွက် အသင်းခေါင်းဆောင်ကို လက်လွှတ်ရန်ဆန္ဒမရှိဘဲ မြင့်မားသည့်လစာဖြင့် သက်တမ်းတိုးစာချုပ် ထပ်မံချုပ်ဆိုရန် ပြင်ဆင်လျက်ရှိသည်။ ဂရီးလစ်ရှ်သည် ပြီးခဲ့သည့်နှစ်စက်တင်ဘာတွင် ၂၀၂၅ ခုနှစ်အထိ သက်တမ်းတိုးခဲ့သော်လည်း ဗီလာအသင်းက ထပ်မံချုပ်ဆိုရန် ကြိုးပမ်းနေခြင်းဖြစ်သည်။

လက်ရှိအချိန်တွင်မူ ၎င်းအား ကမ်းလှမ်းထားသည့်သတင်းကို မန်စီးတီးအသင်းက အတည်ပြုခြင်း မရှိသေးသလို၊ ဗီလာအသင်းကလည်း အကြောင်းပြန်မှုမရှိသေးကြောင်း သိရသည်။