မန်စီးတီးအသင်းသည် အသင်းတိုက်စစ်မှူး ဟော်လန်းအား လစာတိုးပေးပြီး စာချုပ်သစ် ချုပ်ဆိုရန် စီစဉ်နေကြောင်း ဗြိတိန်သတင်းစာ Daily Mail က ဖော်ပြခဲ့သည်။
အသက် ၂၃ နှစ်အရွယ် နော်ဝေလက်ရွေးစင်တိုက်စစ်မှူး ဟော်လန်းသည် ၂၀၂၂ နွေရာသီအပြောင်းအရွှေ့ကာလတွင် ဒေါ့မွန်အသင်းမှ မန်စီးတီးအသင်းထံသို့ ပေါင် ၅၁ သန်းဖြင့် ပြောင်းရွှေ့လာခဲ့သူဖြစ်သည်။ ၎င်းသည် ပြီးခဲ့သည့် ၂၀၂၂-၂၃ ရာသီက ဖလားသုံးလုံးရ မန်စီးတီးအသင်းအတွက် ပြိုင်ပွဲစုံ ၅၃ ပွဲတွင် ၅၂ ဂိုးသွင်းယူခဲ့ပြီး ပရီးမီးယားလိဂ်ပြိုင်ပွဲတွင်လည်း ၃၅ ပွဲတွင် ၃၆ ဂိုးသွင်းကာ ပြိုင်ပွဲသမိုင်းတစ်လျှောက် တစ်ရာသီအတွင်း ဂိုးသွင်းအများဆုံးအဖြစ် စံချိန်သစ် တင်နိုင်ခဲ့သည်။
ဟော်လန်းသည် ယခုရာသီတွင်လည်း မန်စီးတီးအတွက် ပြိုင်ပွဲစုံ ၁၁ ပွဲတွင် ရှစ်ဂိုးသွင်းယူထားပြီး ခြေစွမ်းပြနေသည်။ ဟော်လန်းအား ခေါ်ယူရန် စပိန်ထိပ်သီး ရီးယဲလ်မက်ဒရစ်အသင်းက ပစ်မှတ်ထားနေရာ မန်စီးတီးအသင်းက ၎င်းကို စာချုပ်သစ် ချုပ်ဆိုရန် စီစဉ်လာခြင်းဖြစ်သည်။
မန်စီးတီးအသင်းနှင့် ချုပ်ဆိုထားသည့် ဟော်လန်း၏ လက်ရှိစာချုပ်မှာ ၂၀၂၇ ခုနှစ်တွင် ကုန်ဆုံးမည်ဖြစ်သည်။ သို့သော် မန်စီးတီးအသင်းသည် ရီးယဲလ်မက်ဒရစ်အသင်း၏ အန္တရာယ်ကို စိုးရိမ်သောကြောင့် ဟော်လန်းအား လစာတိုးပေးကာ နှစ်ရှည်စာချုပ် ချုပ်ဆိုရန် စီစဉ်နေခြင်းဖြစ်ကြောင်း သိရှိရသည်။
Daily Mail ၏ ဖော်ပြချက်အရ ဟော်လန်းသည် လက်ရှိတွင် မန်စီးတီးအသင်း၌ တစ်ပတ်လစာ ပေါင် ၄၀၀၀၀၀ နှင့် ဆုကြေးများ ရရှိနေပြီး စာချုပ်သစ်ချုပ်ဆိုပါက ယင်းထက်လစာ ပိုမိုမြင့်တက်လာမည်ဖြစ်ကြောင်း သိရှိရသည်။ ဟော်လန်း၏ ဖခင်ဖြစ်သူကမူ သားဖြစ်သူအနေဖြင့် မန်စီးတီးအသင်းတွင် အချိန်ကြာမြင့်စွာ ကစားဖွယ်မရှိကြောင်း ပြောကြားထားဖူးသည်။
