မန်ယူနောက်ခံလူဟောင်း ဝက်စ်ဘရောင်းက မန်စီးတီးအသင်းနှင့် မန်ချက်စတာဒါဘီကစားမည့် မန်ယူအသင်းအနေဖြင့် မန်စီးတီးတိုက်စစ်မှူး ဟော်လန်းအား ရပ်တန့်နိုင်မည့် နည်းလမ်းရှာရန် တိုက်တွန်းပြောကြားခဲ့သည်။
ပြီးခဲ့သည့်နွေရာသီအပြောင်းအရွှေ့ကာလတွင် ဒေါ့မွန်အသင်းမှ မန်စီး တီးအသင်းသို့ ပြောင်းရွှေ့လာသည့် နော်ဝေလက်ရွေးစင်တိုက်စစ်မှူး ဟော်လန်းသည် ယခုရာသီတွင် မန်စီးတီးအတွက် ခြေစွမ်းပြကစားနေပြီး ပရီးမီးယားလိဂ် (၇) ပွဲတွင် (၁၁) ဂိုးအထိ သွင်းယူထားသည်။
မန်ယူအသင်းသည် ယနေ့တွင် မန်စီးတီးအသင်းကို အဝေးကွင်း၌ ကစားရမည်ဖြစ်ရာ ဝက်စ်ဘရောင်းက ဟော်လန်းကို ထိန်းချုပ်နိုင်ရန်လိုအပ်ကြောင်း ပြောကြားခဲ့ခြင်းဖြစ်သည်။
“ဟော်လန်းက မြန်တယ်။ သန်တယ်။ နောက်ခံလူတွေကို သူ ဘယ်လိုလုပ်ပြခဲ့လဲ ကျွန်တော်တို့ မြင်ပြီးသားပါ။ သူဟာ လေထဲမှာလည်းကောင်းပြီး အမြဲတမ်း(ဂိုးသွင်းဖို့) နေရာမှန်မှာ ရှိနေတတ်တယ်။ ဒီတော့ ဟော်လန်းကို သတိထားရမယ်ဆိုတာကတော့ ပြောစရာတောင် မလိုပါဘူး။ ဒါပေမဲ့ ဟော်လန်းကိုပဲ သတိထားနေလို့ မရပါဘူး။ ဘာလို့လဲဆိုတော့ မန်စီးတီးမှာ ကစားသမားကောင်းတွေ အများကြီးရှိနေလို့ပါ။ ဟော်လန်းအနေနဲ့ ဘောလုံးထိချက်နည်းပေမဲ့ ထိလိုက်ရင်လည်း ဂိုးတော့တာပါပဲ။ သူက ခြေစွမ်းပြနေပြီး သူ့ကို မလေးမစားလုပ်လို့ မရပါဘူး” ဟု ဝက်စ်ဘရောင်းက ပြောကြားခဲ့သည်။
