ဘာစီလိုနာအသင်း၏ ဂန္ထဝင်ကစားသမားတစ်ဦးဖြစ်သူ အင်နီယေစတာက အနာဂတ်ဘောလုံးလောကအတွက် ဒီဘိတ်တစ်ခုအဖြစ် ဟော်လန်းနှင့် ဘာပေ ရွေးချယ်မှုတွင် ပါဝင်လာခဲ့ပြီး ၎င်းကမူ ဘာပေကိုရွေးချယ်ခဲ့ကြောင်း သိရှိရသည်။
အသက် (၃၇)နှစ်အရွယ်ရှိ အင်နီယေစတာအား ဘာစီလိုနာအသင်းအတွက် ဟော်လန်းနှင့် ဘာပေတို့နှစ်ဦးထဲမှ တစ်ဦးဦးကို ခေါ်ယူခွင့်ရမည်ဆိုပါက မည်သူ့ကို ခေါ်ယူမည်နည်းဟု မေးမြန်းခဲ့ရာ ၎င်းက ”သူတို့က လူတိုင်းရဲ့ပါးစပ်ဖျားမှာ ရေပန်းစားနေတဲ့ လူငယ်ကြယ်ပွင့်နှစ်ဦးဖြစ်ပါတယ်။ နှစ်ဦးစလုံးက အရမ်းကောင်းတဲ့ ကစားသမားတွေလည်းဖြစ်တယ်။ ဒါပေမဲ့ သူတို့နှစ်ဦးရဲ့ကစားဟန်တွေကိုကြည့်ပြီး ဆုံးဖြတ်ရမှာဖြစ်ပြီး ကျွန်တော့်အမြင်မှာတော့ ဘာပေရဲ့ကစားဟန်က ဟော်လန်းထက် ဘာစီလိုနာအသင်းနဲ့ပိုကိုက်ညီပါတယ်”ဟုပြောကြားခဲ့သည်။
ထို့ပြင် စပိန်အသင်းအတွက် ခြေစွမ်းပြကစားနေသည့် လူငယ်ကြယ်ပွင့် ဘောလုံးသမား ပက်ဒရီနှင့် ပတ်သက်၍လည်း ”ပက်ဒရီ ခြေစွမ်းပြနေခြင်းရဲ့အဓိကအချက်ကတော့ ပက်ဒရီဖြစ်နေလို့ပါပဲ။ သူက ကျွန်တော် အရမ်းသဘောကျတဲ့ကစားသမားပါ။ ဘာစီလိုနာမှာ ကျွန်တော်ရှိခဲ့ကတည်းက ကောင်းကောင်းသိနေတဲ့ လူငယ်လေးတစ်ဦးဖြစ်ပြီး သူ့ကို ကျွန်တော် ကြည့်လိုက်တဲ့အခါတိုင်း ဘောလုံးကို အရမ်းအာရုံစိုက်ကစားတတ်တာကိုလည်း မြင်ရပါတယ်”ဟု ပြောကြားခဲ့သည်။
