ချယ်လ်ဆီးနည်းပြ တူဟယ်လ်က စပါးတိုက်စစ်မှူး ဟာရီကိန်းသည် ပြိုင်ဘက်ကို အန္တရာယ်အပေးနိုင်ဆုံးတိုက်စစ်မှူးတစ်ဦးဖြစ်ကြောင်း ပြောကြားခဲ့သည်။
ချယ်လ်ဆီးအသင်းသည် ပရီးမီးယားလိဂ်ပွဲစဉ် (၅)အဖြစ် တနင်္ဂနွေနေ့(စက်တင်ဘာ ၁၉ ရက်)တွင် စပါးအသင်းကို အဝေးကွင်း၌ သွားရောက်ယှဉ်ပြိုင်ရမည်ဖြစ်သည်။
စပါးအသင်းနှင့် ကစားမည့် ပရီးမီးယားလိဂ်ပွဲကြိုမီဒီယာတွေ့ဆုံပွဲတွင် ချယ်လ်ဆီးနည်းပြ တူဟယ်လ်က ဟာရီကိန်းကို အာရုံစိုက်ကစားရန် လိုအပ်ကြောင်း ပြောကြားခဲ့ခြင်းဖြစ်သည်။
စပါး-ချယ်လ်ဆီးပွဲတွင် စပါးတိုက်စစ်မှူး ဟာရီကိန်းနှင့် ချယ်လ်ဆီးတိုက်စစ်မှူး လူကာကူတို့၏ အားပြိုင်မှုကို မြင်တွေ့ရမည်ဖြစ်ပြီး ၎င်းတို့နှစ်ဦးနှင့်ပတ်သက်ပြီး သတင်းထောက်တစ်ဦးက တူဟယ်လ်က မေးမြန်းခဲ့သည်။
၎င်း၏မေးမြန်းမှုနှင့်ပတ်သက်ပြီး တူဟယ်လ်က “ဟာရီကိန်းနဲ့ လူကာကူတို့ နှစ်ဦးစလုံးက ပွဲအဖြေကို ပြောင်းလဲနိုင်တဲ့ အဆုံးအဖြတ်ဂိုးတွေကို သွင်းယူနိုင်တဲ့သူတွေပါ။ ဒါပေမဲ့ သူတို့က ခြားနားတဲ့ ကစားသမားတွေဖြစ်ပြီး ကစားပုံချင်းလည်း မတူပါဘူး။ ဟာရီကိန်းက ကမ္ဘာပေါ်မှာ ပြိုင်ဘက်ကို ဒုက္ခအပေးနိုင်ဆုံးတိုက်စစ်မှူးတွေထဲက တစ်ဦးဖြစ်ပါတယ်။ စပါးအသင်းမှာ သူ ပါဝင်လာမယ်ဆိုရင် ကျွန်တော်တို့အနေနဲ့ သူ့ကို ထိန်းချုပ်ဖို့အတွက် အာရုံစိုက်ကစားရမှာပါ”ဟု ပြောကြားခဲ့သည်။
ချယ်လ်ဆီးအသင်းသည် ပရီးမီးယားလိဂ်ပွဲစဉ် (၄)အပြီး ရမှတ် (၁၀)မှတ်ဖြင့် အဆင့်(၁)နေရာမှ မန်ယူအသင်းနှင့် ရမှတ်တူနှင့် ဂိုးကွာခြားချက်တူညီသော်လည်း သွင်းဂိုးလျှော့နည်းမှုကြောင့် အဆင့် (၂)နေရာတွင် ရပ်တည်နေပြီး ချယ်လ်ဆီးအသင်းမှာ ရမှတ် (၉)မှတ်ဖြင့် အဆင့် (၇)နေရာတွင် ရပ်တည်နေသည်။
