ချယ်လ်ဆီးအသင်းသည် လေဗာကူဆင်အသင်းမှ ကွင်းလယ်ကစားသမား ဟာဗက်ဇ်နှင့် PSG အသင်းမှ နောက်ခံလူ သီယာဂိုဆေးလ်ဗားတို့ကို ခေါ်ယူရန် သဘောတူညီမှုရရှိခဲ့ပြီဖြစ်ပြီး လက်စတာနောက်ခံလူ ဘင်ချီဝဲလ်ကို ခေါ်ယူရန်မူ စောင့်ကြည့်နေရဆဲဖြစ်ကြောင်း ဗြိတိန်မီဒီယာများက ဖော်ပြခဲ့ကြသည်။
ချယ်လ်ဆီးအသင်းသည် နည်းပြ လမ်းပတ်၏ နံပါတ်(၁)ပစ်မှတ်ကစားသမားဖြစ်သော ဂျာမန်ကွင်းလယ်လူ ဟာဗက်ဇ်ကို ကနဦးပြောင်းရွှေ့ကြေးပေါင်(၇၂)သန်း၊ Add-ons ကြေးများကိုပါ ထည့်တွက်ပါက စုစုပေါင်း ပေါင်သန်း(၉၀)အထိ ပေးချေရမည်ဟု သိရသည်။
ဟာဗက်ဇ်သည် ယခုရက်သတ္တပတ်အတွင်း လန်ဒန်သို့လာရောက်ကာ အသေးစိတ်အချက်အလက်များကို ဆွေးနွေးသွားမည်ဖြစ်ပြီး (၅)နှစ်စာချုပ် ချုပ်ဆိုဖွယ်ရှိကြောင်း Daily Mail သတင်းစာက ဖော်ပြခဲ့သည်။
PSG အသင်းမှ ဘရာဇီးလ်ဝါရင့်နောက်ခံလူ သီယာဂိုဆေးလ်ဗားကိုမူ ပြောင်းရွှေ့ကြေးအလွတ်ဖြင့် ခေါ်ယူနိုင်ခြင်းဖြစ်ပြီး (၂)နှစ်စာချုပ် ချုပ်ဆိုမည်ဟု သိရသည်။
သီယာဂိုဆေးလ်ဗားသည် လာမည့်လတွင် အသက်(၃၆)နှစ်ပြည့်မည်ဖြစ်သော်လည်း ပြောင်းရွှေ့ကြေးအလွတ်ဖြင့် ရရှိမည့်အခြေအနေကြောင့် ခေါ်ယူလိုသည့်အသင်းများစွာရှိခဲ့ပြီး ၎င်းက ချယ်လ်ဆီးအသင်းကို ရွေးချယ်ခဲ့ခြင်းဖြစ်ကြောင်း သိရသည်။
ချယ်လ်ဆီးအသင်းသည် ယခုနွေရာသီတွင် အေဂျက်စ်မှ ဇီယာ့ရှ်နှင့် လိုက်ပ်ဇစ်မှ တီမိုဗာနာတို့ကို ခေါ်ယူထားပြီးဖြစ်သော်လည်း အားဖြည့်မှုများ ထပ်မံပြုလုပ်နေဆဲဖြစ်ပြီး လက်စတာအသင်းမှ အင်္ဂလန်နောက်ခံလူ ဘင်ချီဝဲလ်ကိုလည်း ခေါ်ယူရန် သဘောတူညီမှုရရှိခဲ့ပြီဟု သတင်းထွက်ခဲ့သည်။
သို့သော် ဘင်ချီဝဲလ်သည် ခြေဖနောင့်ဒဏ်ရာရှိနေသည့်အတွက် ရာသီသစ်အမီ ကစားနိုင်ခြင်းမရှိပါက အပြောင်းအရွှေ့ပျက်ပြယ်ဖွယ်ရှိနေကြောင်း သိရသည်။
ချယ်လ်ဆီးအသင်းသည် ဘင်ချီဝဲလ်ကို ပြောင်းရွှေ့ကြေးပေါင်သန်း(၅၀)ဖြင့် သဘောတူညီမှုရရှိထားခြင်းဖြစ်ပြီး လက်ရှိအချိန်တွင် ဒဏ်ရာအခြေအနေကို စောင့်ကြည့်နေကြောင်း သိရသည်။
