ချဲလ်ဆီး အသင်း ရဲ့ ဂျာမန် လက်ရွေးစင် တိုက်စစ်မှူး တီမို ဗာနာ ဟာ ပြီးခဲ့တဲ့ ကြားရက် အတွင်း ကစားခဲ့တဲ့ ဝုလ်ဗ် အသင်း နဲ့ ဂိုးမရှိ သရေ ရလဒ် ထွက်ပေါ်ခဲ့တဲ့ ပရီးမီးယားလိဂ် ပွဲမှာ ပွဲထွက်စာရင်းမှ ချန်လှပ်ခံခဲ့ရသလို ၊ တပွဲလုံး တမိနစ်မျှ ဝင်ကစားခွင့် မရခဲ့ပါဘူး ။
ဒီပွဲဟာ ပြီးခဲ့တဲ့ ရက်ပိုင်း အတွင်း ဖရန့် လမ်းပတ် ရဲ့ နေရာသို့ အစားဝင်ခဲ့တဲ့ နည်းပြသစ် သောမတ်စ် တူချယ် ရဲ့ ပထမဆုံး ပရီးမီးယားလိဂ်ပွဲ ဖြစ်ခဲ့ပြီး ၊ ဗာနာ အပြင် လမ်းပတ် လက်ထက် က အမာခံ ပွဲထွက် ကစားသမား တချို့ ဖြစ်ကြတဲ့ ခရစ်တီယန် ပူလီဆစ် ၊ မေဆင်မောင့် ၊ ကတ်ဇူးမား ၊ ရိစ်ဂျိမ်းစ် တို့လည်း ပွဲထွက်စာရင်း ကနေ ချန်လှပ်ခံခဲ့ရပါတယ် ။
ဗာနာ ဟာ ဝုလ်ဗ် နဲ့ ပွဲမှာ ပွဲထွက်ခွင့် မရခင် အထိ ၊ နောက်ဆုံး ကစားခဲ့တဲ့ ပြိုင်ပွဲစုံ ၁၅ပွဲမှာ ၁ဂိုးသာ ရရှိခဲ့ပြီး ၊ ပင်နယ်တီ လွဲချော်မှု တခု အပါအဝင် အဆိုးရွားဆုံးသော ဂိုးကံခေမှု အချိန် ကာလ တခု ကို ဖြတ်သန်းနေရဆဲ ဖြစ်ပါတယ် ။ နည်းပြဟောင်း လမ်းပတ် ဟာ ဗာနာ ဆီကနေ အကောင်းဆုံးသော အရည်အသွေးတွေကို လုံးဝ ထုတ်ယူ သုံးစွဲနိုင်ခဲ့ခြင်း မရှိပါဘူး ။
ဒီတော့ လမ်းပတ် နေရာ အစားဝင်ထားတဲ့ တူချယ် ဟာလည်း ဗာနာ ကို ဘယ်လို ဘယ်ပုံ ဆက်လက် အသုံးပြုမလဲ ဆိုတာ စိတ်ဝင်စားစရာတော့ ကောင်းနေပါပြီ ။ ပြီးခဲ့တဲ့ ပွဲကြို သတင်းစာ ရှင်းလင်းပွဲမှာတော့ တူချယ် က ဗာနာ ကို ဝုလ်ဗ် နဲ့ ပွဲမှာ ဘာကြောင့် အသုံးမပြုခဲ့လဲ ဆိုတာ ရှင်းပြရင်း ၊ ၎င်းကို ပုံမှန်ခြေစွမ်း ပြန်ရအောင် လမ်းကြောင်းပေးဖို့ ဆိုတာ သူ့အလုပ် ဖြစ်ကြောင်း အခုလိုပဲ ဖွင့်ဟခဲ့ပါတယ် ။
တူချယ် က ” ပြီးခဲ့တဲ့ ဗုဒ္ခဟူးနေ့က တီမို ကို ဘာကြောင့် မသုံးခဲ့သလဲ ? သူ့မျက်နှာ ကို ကျွန်တော် သေသေချာချာ အနီးကတ် အကဲခတ်ပြီးနောက် ၊ ဖိအားတွေ ၊ ဝန်တွေ အရမ်း များနေတဲ့ပုံပေါ်လို့ ၊ အဲဒီပွဲမှာ သူ့ကို မသုံးဖို့ ဆုံးဖြတ်ခဲ့တာပါ ။ သူဟာ ဒီ ကလပ် အတွက် အရမ်း ဂရုစိုက်ပါတယ် ။ ဒါဟာ သူ့ရဲ့ အံ့သြဖွယ် ခံယူချက်တွေထဲက တခုပါပဲ ။ ”
” တခါတလေတော့ တိုက်စစ်မှူး တဦးအတွက် ကိုယ်ပိုင် ခြေစွမ်းကို ပဓာန မထားပဲ ၊ အသင်း အတွက် အများကြီး ငဲ့ကွက်နေတာက ကောင်းတဲ့ အချက်တော့ မဟုတ်ဘူး ။ တိုက်စစ်မှူး တဦး အဖို့ တခါတလေမှာ ဘယ်သူ့ကိုမှ ဂရုမစိုက်တာ ပိုတောင် ကောင်းပါသေးတယ် ။ ဒါပေမယ့် တီမို ဟာ ဒီလို အသင်းသားမျိုးတော့ မဟုတ်ပါဘူး ။ ”
” သူဟာ အသင်းဖော်တွေရဲ့ အရေး ကို ဂရုစိုက် ငဲ့ကွက်တတ်ပြီး ၊ နောက်ပိုင်း ပွဲတွေမှာ ထွက်ပေါ်ခဲ့တဲ့ အသင်း ရဲ့ ရလဒ်ပိုင်း နဲ့ ခြေစွမ်း အပိုင်း အပေါ် သူ အတော်လေး မပျော်မရွှင် ဖြစ်နေခဲ့ပါတယ် ။ အခုအချိန်မှာ ကိုယ့်ကိုယ်ကို ယုံကြည်မှု ပြန်လည် တည်ဆောက်ဖို့ ၊ ပျော်ပျော်နေဖို့ ၊ ကိုယ့်ကိုယ်ကို သံသယဝင်ခြင်း ကနေ ရပ်တန့်ဖို့ ဆိုတာ သူ့အတွက် အရမ်း အရေးကြီးနေပါတယ် ။ ”
” ဒီလို ဖြစ်လာဖို့ သူ့ကို အကူအညီ ပေးဖို့ ၊ သူ့ရဲ့ အားသာချက်တွေကို အသုံးချနိုင်မယ့် နော တနေရာ ကို ရှာဖွေပေးဖို့ ဆိုတာ ကျွန်တော့ အလုပ်ပါပဲ ။ တီမို အတွက် အနာဂတ် မှာ ကစားဖို့ ပွဲတွေ အများကြီး ရှိလာမှာပါ ။ ပြီးခဲ့တဲ့ ဗုဒ္ဓဟူးနေ့က ပွဲမှာ ကျွန်တော် တို့ဟာ ဘောလုံး ပိုင်ဆိုင်မှု ၈၀ ရာခိုင်နှုန်းလောက်နဲ့ ဖိကစားခဲ့ပါတယ် ။ ”
” အဲ့ဒီပွဲရဲ့ ၉၀ ရာခိုင်နှုန်း ဟာ ကျွန်တော်တို့ချည်းသာ ကစားခဲ့တာ ဖြစ်ပြီး ၊ ပြိုင်ဖက်ကွင်း ရဲ့ နောက်ဆုံး မီတာ ၃၀ အကွာအဝေး အတွင်း အချိန်ပြည့်နီးပါး ကျွန်တော်တို့ ထိုးဖောက်နိုင်ခဲ့ပါတယ် ။ ဒါပေမယ့် အဲလိုပွဲမျိုးမှာ တီမိုဖက်က ကျွန်တော် တို့ကို အကူအညီ ပေးနိုင်မယ့် လှုပ်ရှားမှုတွေ ကမ်းလှမ်းပေးလို့ ရပါတယ် ။ ”
” တိုက်စစ်မှူး တဦး ဖြစ်တဲ့အညီ ၊ သူကစားလာခဲ့တဲ့ စတိုင်လ် အရ ကျွန်တော် ကတော့ သူ့အတွက် နေရာလွတ်တွေ ရှာဖွေပေးဖို့ကို ပိုပြီး အလိုရှိမိပါတယ် ။ ဘာလို့လဲ ဆိုတော့ သူဟာ အရမ်း လျင်မြန်သလို ၊ ပြိုင်ဖက် ခံစစ် ရဲ့ နောက်ဆုံးလိုင်း မှာ ကစားနိုင်စွမ်း ရှိလို့ပါ ။ တဖက်မှာ သူဟာ ဘယ်တောင်ပံ အခြမ်း ကို အနည်းငယ် ထွက်ကစားတတ်ပြီး ၊ အဲဒီကနေ တဆင့် ဘောလုံး လက်ခံရယူပါတယ် ။ ”
” တီမို ရဲ့ ရွေ့လျားပုံ ၊ ကစားပုံ စတိုင်လ် ၊ ကျဉ်းမြောင်းတဲ့ နေရာလွတ်တွေ အကြား က အရည်အသွေးတွေနဲ့ ပတ်သက်ပြီး ကျွန်တော်တို့ဖက်က သူ့အတွက် တိုးတက်မှု ရှိအောင် လုပ်ပေးနိုင်မလား ? ဒါဟာ ကျွန်တော့ အလုပ်ပါပဲ ။ သူ့ရဲ့ တိုးတက်မှု အတွက် ကူညီပေးနိုင်မယ် လို့ ကျွန်တော်တို့ ယုံကြည်ထားပါတယ် ။ ဘာလို့လဲ ဆိုတော့ တီမို ဟာ ပွင့်လင်းတဲ့စိတ် ၊ ခင်မင်ရင်းနှီးလိုစိတ် ၊ သင်ယူလိုစိတ် အပြည့် ရှိလို့ပါပဲ ။ ” လို့ ပြောကြားခဲ့ပါတယ် ။
