အင်္ဂလန်ဘောလုံးအဖွဲ့ချုပ် (FA)သည် လူမျိုးရေး/အသားအရောင်ခွဲခြားမှုများအတွက် အရေးယူသည့်ပြစ်ဒဏ်ကို နှစ်ဆတိုးမြှင့်ခဲ့ပြီး လာမည့်ဘောလုံးရာသီ၌ ကျူးလွန်သူများကို ပြင်းပြင်းထန်ထန်အရေးယူသွားမည်ဖြစ်ကြောင်း သိရသည်။
ယခင်က ယင်းကဲ့သို့ ခွဲခြားမှုများအတွက် အနိမ့်ဆုံးပြစ်ဒဏ်(၆)ပွဲပယ်ရန် သတ်မှတ်ထားပြီး ယခု အနိမ့်ဆုံး(၁၂)ပွဲပယ်အဖြစ် သတ်မှတ်လိုက်ခြင်းဖြစ်သည်။
အကယ်၍ကစားသမားတစ်ဦးအနေဖြင့် ယခင်က လူမျိုးရေး/အသားအရောင်ခွဲခြားသည့် ပြစ်မှုကျူးလွန်ဖူးသည့်မှတ်တမ်းဟောင်း ရှိခဲ့ပါက နောက်တစ်ကြိမ်ကျူးလွန်မှုတွင် ပိုမိုပြင်းထန်သည့် ပြစ်ဒဏ်ချမှတ်သွားမည်ဖြစ်ကြောင်း သိရသည်။
သို့ဖြစ်ရာ ယင်းကစားသမားအနေဖြင့် ပွဲပယ်ပြစ်ဒဏ်(၁၂)ပွဲထက် ပိုမိုကျခံရမည်ဖြစ်ကြောင်း သိရသည်။
FA သည် လူမျိုးရေးခွဲခြားမှုများအတွက် ပြစ်ဒဏ်ချမှတ်ရာတွင် (၆)ပွဲအောက်ချမှတ်ဖူးသော်လည်း ယင်းမှာ ပုံမှန်မဟုတ်သည့်ထူးခြားသော ဖြစ်ရပ်မျိုး (မရည်ရွယ်ဘဲ အချင်းချင်း စနောက်မိခြင်း)တွင်သာ ဖြစ်ကြောင်း သိရသည်။
၂၀၁၉ စက်တင်ဘာလအတွင်းက မန်စီးတီးတောင်ပံကစားသမား ဘာနာဒိုဆေးလ်ဗားမှာ အသင်းဖော်နောက်ခံလူ မန်ဒီကို လူမျိုးရေး/အသားအရောင်ခွဲခြားသည့် ရည်ရွယ်ချက်မရှိသော်လည်း စနောက်ခဲ့ခြင်းအတွက် (၁)ပွဲပယ်ခံခဲ့ရသည်။
