ချယ်လ်ဆီးအသင်းက ခေါ်ယူရန် ပစ်မှတ်ထားနေသည့် လီဝန်ဒေါစကီးကို ရောင်းမည်မဟုတ်ကြောင်းနှင့် လီဝန်ဒေါစကီးအနေဖြင့် အသင်းတွင် သေချာပေါက် နောက်ထပ် (၂)ရာသီ ဆက်ရှိနေမည်ဖြစ်ကြောင်း ဘိုင်ယန်မြူးနစ်အသင်း၏ဥက္ကဋ္ဌဖြစ်သူ ဟာဘတ်ဟိုင်နာက အတည်ပြုပြောကြားခဲ့သည်။
အသက် (၃၂)နှစ်အရွယ်ရှိ ပိုလန်ဝါရင့်တိုက်စစ်မှူး လီဝန်ဒေါစကီးသည် ဘိုင်ယန်မြူးနစ်အသင်းနှင့် ၂၀၂၃ ခုနှစ်အထိ စာချုပ်ချုပ်ဆိုထားသူ ဖြစ်သည်။
ချယ်လ်ဆီးအသင်းသည် လီဝန်ဒေါစကီးကို ယခုနွေရာသီအပြောင်းအရွှေ့ကာလတွင် ခေါ်ယူရန် ပစ်မှတ်ထားနေပြီး ၎င်း၏အခြေအနေကို စောင့်ကြည့်မှုများ ပြုလုပ်နေကြောင်း ဗြိတိန်မီဒီယာများက ဖော်ပြနေကြသည်။
သို့သော် ဘိုင်ယန်မြူးနစ်ဥက္ကဋ္ဌ ဟာဘတ်ဟိုင်နာက လီဝန်ဒေါစကီးအနေဖြင့် အသင်းနှင့်ချုပ်ဆိုထားသည့် စာချုပ်ကို တန်ဖိုးထားကြောင်း ပြောကြားခဲ့ခြင်းဖြစ်သည်။
ဟာဘတ်ဟိုင်နာက “ပထမဆုံးအနေနဲ့ ကျွန်တော်ပြောချင်တာကတော့ လီဝန်ဒေါစကီးဟာ ကမ္ဘာ့အကောင်းဆုံးတိုက်စစ်မှူးပါ။ ဒီတော့ ကျွန်တော်တို့အသင်းမှာ သူ ရှိနေတာကို ကျွန်တော်တို့ အရမ်းပျော်ပါတယ်။ ပြီးတော့ အသင်းနဲ့ချုပ်ဆိုထားတဲ့ သူ့ရဲ့စာချုပ်က သက်တမ်း(၂)နှစ် ကျန်ရှိနေပါသေးတယ်။ အဲဒီ(၂)နှစ်အတွင်း ဘိုင်ယန်မြူးနစ်အသင်းမှာပဲ သူ သေချာပေါက် ဆက်ကစားပါလိမ့်မယ်။ အရင်က ကျွန်တော်ပြောခဲ့သလိုပါပဲ။ လီဝန်ဒေါစကီးကို အသင်းမှာကာလရှည်ဆက်ရှိနေဖို့ ကျွန်တော်တို့ စဉ်းစားနေပါတယ်။ သူဟာ စာချုပ်ကို တန်ဖိုးထားပါတယ်”ဟု ပြောကြားခဲ့သည်။
လီဝန်ဒေါစကီးသည် ၂၀၁၄ တွင် ဒေါ့မွန်အသင်းမှ ဘိုင်ယန်မြူးနစ်အသင်းသို့ ပြောင်းရွှေ့ကြေးအလွတ်ဖြင့် ရောက်ရှိလာခဲ့ပြီး (၇)ရာသီအတွင်း ပြိုင်ပွဲစုံ (၃၂၉)ပွဲတွင် (၂၉၄)ဂိုးသွင်းယူထားသည်။
