လီဗာပူးလ်အသင်းနှင့် စာချုပ်သစ် ချုပ်ဆိုနိုင်သည့်အတွက် ဂုဏ်ယူကြောင်း အာနိုးလ် ဆို

လီဗာပူးလ်နောက်ခံလူ အာနိုးလ်က အသင်းနှင့် စာချုပ်သစ်ချုပ်ဆိုနိုင်သည့်အတွက် ဂုဏ်ယူကြောင်း အသင်းဝက်ဘ်ဆိုက်သို့ ပြောကြားခဲ့သည်။

လီဗာပူးလ်အသင်းသည် အသင်းအကယ်ဒမီထွက် ကစားသမားတစ်ဦးဖြစ်သည့် အာနိုးလ်ကို ၂၀၂၅ ခုနှစ်အထိ သက်တမ်းရှိ စာချုပ်သစ်တစ်ရပ် ချုပ်ဆိုခဲ့သည်။

အသက် (၂၂)နှစ်အရွယ်ရှိ အင်္ဂလန်နောက်ခံလူ အာနိုးလ်သည် ၂၀၁၆ ခုနှစ်တွင် လီဗာပူးလ်အသင်း၏ အဓိကကစားသမားဖြစ်လာခဲ့ပြီး လီဗာပူးလ်အသင်း ချန်ပီယံလိဂ်နှင့် ပရီးမီးယားလိဂ်ချန်ပီယံဆုများကို ရရှိရာတွင် အဓိကနေရာမှ ပါဝင်ခဲ့သူဖြစ်သည်။

အာနိုးလ်အနေဖြင့် လီဗာပူးလ်အသင်းနှင့် စာချုပ်သစ် ချုပ်ဆိုနိုင်ခဲ့ခြင်းကြောင့် လစာငွေတိုးမြှင့်ရရှိခဲ့ပြီး အသင်းတွင် လစာအများဆုံးရရှိသူများစာရင်းတွင် ပါဝင်လာခဲ့ကြောင်းလည်း The Times က ဖော်ပြခဲ့သည်။

အာနိုးလ်က “အသင်းက ကျွန်တော့်အပေါ် ယုံကြည်မှုရှိကြောင်း ဒီအခွင့်အရေးကိုပေးပြီး ပြသခဲ့တဲ့အတွက် ကျွန်တော် ဂုဏ်ယူပါတယ်။ ကျွန်တော့်ရဲ့ ကစားသမားဘဝနဲ့ လီဗာပူးလ်အသင်းရဲ့ အနာဂတ်ဟာ ကောင်းတဲ့အနေအထားမှာ ရှိနေပြီး ဒီအသင်းမှာ နှစ်တွေ အများကြီး ကစားခွင့်ရမှာဖြစ်လို့ ကျွန်တော် ပျော်ပါတယ်။ အသင်းနဲ့ စာချုပ်သစ်ချုပ်ဆိုနိုင်ခြင်းဟာ ကျွန်တော့်အတွက် ဂုဏ်ယူစရာဖြစ်ပြီး ဒီအခွင့်အရေးကိုပေးခဲ့တဲ့ တာဝန်ရှိသူတွေကို ကျေးဇူးတင်ပါတယ်”ဟု ပြောကြားခဲ့သည်။

အာနိုးလ်သည် လီဗာပူးလ်အသင်းအတွက် (၅)ရာသီအတွင်း ပြိုင်ပွဲစုံ (၁၇၉)ပွဲတွင် (၁၀)ဂိုး သွင်းယူထားပြီး အသင်းနှင့်အတူ ချန်ပီယံလိဂ်၊ ပရီးမီးယားလိဂ် ချန်ပီယံဆုများအပါအဝင် ဆုဖလား (၄)လုံး ရယူထားသည်။