လီဗာပူးလ်နှင့်ကစားမည့်ပွဲကို သီယာဂိုဆေးလ်ဗား၊ ဘင်ချီဝဲလ်၊ ပူလီဆစ်နှင့် ဇီယာ့ရှ်တို့ လွဲချော်မည်ဟု လမ်းပတ် အတည်ပြု

ချယ်လ်ဆီးအသင်းနည်းပြ လမ်းပတ်က လီဗာပူးလ်အသင်းနှင့် ကစားမည့် ပရီးမီးယားလိဂ်ပွဲစဉ်ကို အသင်းကစားသမားများဖြစ်သည့် သီယာဂိုဆေးလ်ဗား၊ ဘင်ချီဝဲလ်၊ ပူလီဆစ်နှင့် ဇီယာ့ရှ်တို့ လွဲချော်မည်ဟု အတည်ပြုပြောကြားခဲ့သည်။ 

ချယ်လ်ဆီးအသင်းသည် ပရီးမီးယားလိဂ်အဖွင့်ပွဲတွင် ဘရိုက်တန်အသင်းကို အဝေးကွင်း၌ (၃-၁)ဂိုးဖြင့် အနိုင်ရခဲ့ပြီး ပွဲစဉ် (၂)အဖြစ် စက်တင်ဘာ (၂၀)ရက်တွင် လက်ရှိချန်ပီယံ လီဗာပူးလ်အသင်းကို အိမ်ကွင်း၌ လက်ခံကစားရမည်ဖြစ်သည်။ 

အဆိုပါပွဲစဉ်တွင် ယခုနွေရာသီအပြောင်းအရွှေ့ကာလ၌ ခေါ်ယူထားသည့် သီယာဂိုဆေးလ်ဗား၊ ဘင်ချီဝဲလ်နှင့် ဇီယာ့ရှ်တို့အပြင် အသင်းတောင်ပံကစားသမား ပူလီဆစ်မှာလည်း ပါဝင်ကစားနိုင်မည်မဟုတ်ကြောင်း ချယ်လ်ဆီးနည်းပြ လမ်းပတ်က ပြောကြားခဲ့ခြင်းဖြစ်သည်။ 

လမ်းပတ်က “ဘင်ချီဝဲလ်နဲ့ ပူလီဆစ်တို့ဟာ ပွဲကစားဖို့ အသင့်မဖြစ်သေးပါဘူး။ ကျွန်တော့်အနေနဲ့ လာမယ့်တစ်ပတ်မှာ သူတို့အနေနဲ့ တိုးတက်လာမယ်လို့ မျှော်လင့်ပါတယ်။ ဇီယာ့ရှ်ကလည်း ပွဲကစားဖို့ အဆင်မပြေသေးပါဘူး။ သီယာဂိုဆေးလ်ဗားကတော့ ကြံ့ခိုင်မှုပြည့်ဝဖို့ ကြိုးစားနေဆဲဖြစ်ပြီး လီဗာပူးလ်နဲ့ပွဲက သူ့အတွက် စောလွန်းနေပါသေးတယ်”ဟု ပြောကြားခဲ့သည်။

သို့သော် ဘရိုက်တန်အသင်းအား အနိုင်ရသည့်တွင် အသေးစားဒူးဒဏ်ရာရခဲ့သည့် တိုက်စစ်မှူး တီမိုဗာနာမှာမူ လီဗာပူးလ်နှင့်ပွဲတွင် ပါဝင်ကစားရန် ကြံ့ခိုင်မှုပြည့်ဝကြောင်း လမ်းပတ်က ဆိုခဲ့သည်။ 

ထို့ပြင် လမ်းပတ်က လီဗာပူးလ်နှင့်ကစားမည့်ပွဲစဉ်မှာ မိမိတို့အတွက် စိန်ခေါ်မှုဖြစ်ပြီး အနိုင်(၃)မှတ်ရအောင် အကောင်းဆုံးကြိုးစားသွားမည်ဖြစ်ကြောင်းလည်း ပြောကြားခဲ့သည်။