စပါးနှင့် အက်စတွန်ဗီလာအသင်းနည်းပြဟောင်း တင်မ်ရှားဝုဒ်က ယာဂန်ကလော့ပ်အနေဖြင့် လီဗာပူးလ်အသင်းတွင် သူ တတ်နိုင်သလောက် လုပ်ပေးပြီးဖြစ်ပြီး ယခုရာသီကုန်တွင် အသင်းမှထွက်ခွာလိမ့်မည်ဟု သုံးသပ်ပြောကြားခဲ့သည်။
အသက် (၅၅)နှစ်အရွယ်ရှိ ဂျာမန်လူမျိုးနည်းပြ ယာဂန်ကလော့ပ်သည် ၂၀၁၅ အောက်တိုဘာတွင် လီဗာပူးလ်အသင်းကို စတင်ကိုင်တွယ်ခဲ့ပြီး (၇)ရာသီအတွင်း ချန်ပီယံလိဂ်၊ ပရီးမီးယားလိဂ်၊ FA ဖလား၊ လိဂ်ဖလား၊ ဥရောပစူပါဖလား၊ ဖီဖာကလပ်ကမ္ဘာ့ဖလားနှင့် ကွန်မြူနတီဒိုင်းများ ရယူပေးထားသည်။
ကလော့ပ်သည် ပြီးခဲ့သည့်ဧပြီလကမှ လီဗာပူးလ်အသင်းနှင့် ၂၀၂၆ ခုနှစ်အထိ သက်တမ်းရှိ စာချုပ်သစ်တစ်ရပ် ချုပ်ဆိုထားသူဖြစ်သည်။
သို့သော် လီဗာပူးလ်အသင်းသည် ယခုရာသီ ပရီးမီးယားလိဂ်ပွဲစဉ် (၁၁)ပွဲကစားပြီးချိန်တွင် (၄)ပွဲနိုင်၊ (၄)ပွဲသရေ၊ (၃)ပွဲရှုံး၊ ရမှတ် (၁၆)မှတ်ဖြင့် အဆင့် (၈)နေရာ ရပ်တည်နေကာ ထိပ်ဆုံးမှ အာဆင်နယ်အသင်း(၂၈ မှတ်)နှင့် (၁၂) မှတ်ထိ ကွာဟနေသည်။
ထို့ကြောင့် ယာဂန်ကလော့ပ်အနေဖြင့် လီဗာပူးလ်နည်းပြရာထူးမှ ထုတ်ပယ်ခံရနိုင်သည်ဟု သုံးသပ်မှုများရှိလာခဲ့ပြီး စပါးနည်းပြဟောင်း တင်မ်ရှားဝုဒ်ကမူ လီဗာပူးလ်အသင်းအနေဖြင့် ကလော့ပ်ကို ထုတ်ပယ်မည်မဟုတ်ဘဲ ကလော့ပ်ဘက်ကသာ လမ်းခွဲမှုပြုလုပ်လိမ့်မည်ဟု သုံးသပ်ခဲ့ခြင်းဖြစ်သည်။
”ချန်ပီယံဆုတွေကို စိန်ခေါ်နေတဲ့အသင်းအတွက် အခုအခြေအနေက ကစားသမားတွေအတွက် တော်တော်လေး ခက်ခဲပါလိမ့်မယ်။ ကလော့ပ်အနေနဲ့ လာမယ့်ရာသီ လီဗာပူးလ်မှာ ဆက်ရှိနေမယ်လို့ ကျွန်တော် မထင်ဘူး။ ကလော့ပ်က ဒီအသင်းကို ချန်ပီယံဆုတွေ စိန်ခေါ်နိုင်အောင် ပြန်လုပ်ပေးမယ်လို့ မထင်ဘူး။ ဘာလို့လဲဆိုတော့ အရင်ကလည်း သူ မလုပ်ခဲ့ဘူးလေ။ လီဗာပူးလ်က ကလော့ပ်ကို ထုတ်မှာမဟုတ်ပါဘူး။ ကလော့ပ်နဲ့ လီဗာပူးလ်ကြား ဆွေးနွေးတာတွေ ရှိမှာပါ။ ကလော့ပ်က လီဗာပူးလ်မှာ သူလုပ်နိုင်တာတွေ လုပ်ပေးခဲ့ပြီးပါပြီ။ စိန်ခေါ်မှုသစ်တွေအတွက် သူတို့ လမ်းခွဲကြပါလိမ့်မယ်”ဟု ပြောကြားခဲ့သည်။
