အက်သလက်တီကိုအသင်းနည်းပြ ဆီမြွန်နီက လိုက်ပ်ဇစ်အသင်းအား ရှုံးနိမ့်ခဲ့ခြင်းအတွက် ဆင်ခြေပေးစရာမရှိကြောင်း ပြောကြားခဲ့သည်။
အက်သလက်တီကိုအသင်းသည် သြဂုတ်လ (၁၃)ရက်က ကစားခဲ့သည့် ချန်ပီယံလိဂ်ကွာတားဖိုင်နယ်ပွဲစဉ်တွင် ဂျာမန်ကလပ် လိုက်ပ်ဇစ်အသင်းကို (၁-၂)ဂိုးဖြင့် ရှုံးနိမ့်ပြီး ပြိုင်ပွဲမှ ထွက်ခွာခဲ့ရသည်။
အဆိုပွဲစဉ်အပြီးတွင် ဆီမြွန်နီက ၎င်းတို့အသင်းအား အနိုင်ယူခဲ့သည့် လိုက်ပ်ဇစ်အသင်းကို ချီးကျူးစကား ပြောကြားခဲ့သည်။
ဆီမြွန်နီက “ကျွန်တော်တို့ အစွမ်းကုန်ကြိုးစားခဲ့ပါတယ်။ ဒါပေမဲ့ ကျွန်တော်တို့ ကစားချင်တဲ့ပုံစံအတိုင်း ဖြစ်မလာခဲ့ပါဘူး။ လိုက်ပ်ဇစ်အသင်းကို ကျွန်တော် သဘောကျပါတယ်။ သူတို့ဟာ ဒီနိုင်ပွဲကို အနိုင်ယူဖို့အတွက် စိတ်ဆန္ဒအလွန်ပြင်းပြနေပြီး ကစားသမားတွေကလည်း လန်းဆန်းတက်ကြွနေပါတယ်။ ဒါကြောင့် ကျွန်တော်တို့ အရှုံးပေးခဲ့ရတာပါ။ ရှုံးပွဲအတွက် ဆင်ခြေပေးစရာမရှိပါဘူး။ လိုက်ပ်ဇစ်အသင်းကို ချီးကျူးရမှာပါ”ဟု ပြောကြားခဲ့သည်။
အက်သလက်တီကိုကွင်းလယ်လူ ဆာအူလ်ကလည်း ယခုပွဲစဉ်တွင် လိုက်ပ်ဇစ်အသင်းသည် မိမိတို့ထက် ပိုကောင်းခဲ့ပြီး နိုင်ပွဲကို ထိုက်ထိုက်တန်တန်ရရှိခဲ့ခြင်းဖြစ်ကြောင်းနှင့် အသင်းပရိသတ်များကို စိတ်ပျက်စေသည့်အတွက် တောင်းပန်ကြောင်း ပြောကြားခဲ့သည်။
