မန်ချက်စတာယူနိုက်တက်နည်းပြ ဆိုးလ်ရှားက အသင်းတောင်ပံကစားသမားသစ် ဆန်ချိုအနေဖြင့် လိဒ်စ်အသင်းနှင့်ကစားမည့်ပွဲအတွက် အသင့်မဖြစ်သေးကြောင်း ပြောကြားခဲ့သည်။
အသက် (၂၁)နှစ်အရွယ်ရှိ အင်္ဂလန်တောင်ပံကစားသမား ဆန်ချိုသည် ယခုနွေရာသီအပြောင်းအရွှေ့တွင် ဒေါ့မွန်အသင်းမှ မန်ချက်စတာယူနိုက်တက်အသင်းသို့ ပေါင် (၇၃)သန်းဖြင့် ပြောင်းရွှေ့လာခဲ့သူဖြစ်သည်။
၎င်းသည် ယခုအပတ်တွင်မှ အသင်းနှင့်ပူးပေါင်းခဲ့ပြီး ယနေ့ကစားမည့် လိဒ်စ်အသင်းနှင့်ပွဲအတွက် အသင့်မဖြစ်သေးကြောင်း ဆိုးလ်ရှားက ပြောကြားခဲ့ခြင်းဖြစ်သည်။
ဆိုးလ်ရှားက “ယူရို-၂၀၂၀ ပြိုင်ပွဲပြီးတော့ ဆန်ချိုဟာ အားလပ်ရက် အပန်းဖြေခရီးထွက်ခဲ့ပါတယ်။ အသင်းကို ပြန်လာချိန်မှာ ဆန်ချိုဟာ ကံမကောင်းစွာဘဲ အနည်းငယ်ဖျားနေခဲ့ပါတယ်။ သူ့အနေနဲ့ အသင်းနဲ့အတူ လေ့ကျင့်ချိန် နည်းပါးနေသေးသလို၊ လေ့ကျင့်မှုအများကြီး မလုပ်ရသေးပါဘူး။ ဆန်ချိုအနေနဲ့ ကြံ့ခိုင်မှုပြည့်ဝဖို့ အချိန်အနည်းငယ် ယူရဦးမှာပါ။ သူဟာ ဒီရာသီမှာ အသင်းကို တိုးတက်စေမယ့်သူ ဖြစ်ပြီး ကျွန်တော်တို့အတွက် အရမ်းကို အရေးပါတဲ့ ကစားသမားဖြစ်ပါတယ်”ဟု ပြောကြားခဲ့သည်။
မန်ချက်စတာယူနိုက်တက်အသင်းသည် ယနေ့ညနေတွင် ပရီးမီးယားလိဂ်အဖွင့်ပွဲအဖြစ် လိဒ်စ်အသင်းကို အိမ်ကွင်း၌ လက်ခံကစားရမည်ဖြစ်သည်။
