စပါးအသင်းနှင့် မန်စီးတီးအသင်းတို့ ယှဉ်ပြိုင်ကစားကြမည့် လိဂ်ဖလားဗိုလ်လုပွဲအတွက် ပရိသတ် (၈၀၀၀) ဝင်ရောက်ကြည့်ရှု ခွင့်ရမည်ဖြစ်ပြီး၊ ယင်းလက်မှတ်များအနက် တစ်ဝက်ကိုသာ နှစ်ဖက်အသင်းပရိသတ်များ ရရှိမည်ဟု သိရှိရသည်။
စပါးအသင်းနှင့် မန်စီးတီးအသင်းတို့သည် လက်မှတ် (၈၀၀၀) အနက် တစ်သင်းလျှင်လက်မှတ် (၂၀၀၀)စီသာရရှိမည်ဖြစ်ပြီး၊ ကျန်လက်မှတ်များမှာ NHS ဝန်ထမ်းများနှင့် ဒေသတွင်းနေထိုင်သူများအတွက် ဖြစ်ကြောင်းလည်း သိရှိရသည်။
COVID-19 ကာလအတွင်း ရှေ့တန်းမှနေ၍ ကြိုးစားဆောင်ရွက်ခဲ့ကြသည့် NHS ၏ ကျန်းမာရေးဝန်ထမ်းများအတွက် အထူးဦးစားပေး ဂုဏ်ပြုပေးခဲ့ခြင်းဖြစ်ပြီး ဒေသတွင်းနေထိုင်သူအနည်းငယ်လည်း ရရှိမည်ဖြစ်သည်။
ယင်းပွဲစဉ်ကို ဧပြီလ (၂၅) ရက်နေ့တွင် ယှဉ်ပြိုင်ကစားသွားမည်ဖြစ်ပြီး ပွဲမတိုင်မီနှင့် ကွင်းထဲမှ အထွက်တွင် COVID စစ်ဆေးမှုများကို ပြုလုပ်သွားမည်ဖြစ်သည်။
ထို့ပြင် EFL သည် ယင်းဗိုလ်လုပွဲစဉ်တွင် ကစားမည့် အသင်းနှစ်သင်းစလုံးအနေဖြင့် Thank You NHS စာတန်းပါ ဝတ်စုံများကို ဝတ်ဆင်ကစားစေရန် စီစဉ်ထားကြောင်းလည်း သိရှိရသည်။
လိဂ်ဖလားဗိုလ်လုပွဲသည် အမှန်တကယ်အားဖြင့် ပြီးခဲ့သည့် ဖေဖော်ဝါရီလကတည်းက ကစားရမည့် ပွဲစဉ်တစ်ပွဲဖြစ်ပြီး EFL က ပရိသတ်များနှင့်အတူ ကစားနိုင်ရန်အတွက် ဧပြီလအထိ ရွှေ့ဆိုင်းခဲ့ခြင်းလည်း ဖြစ်သည်။
EFL အမှုဆောင်ချုပ် ရစ်ပယ်ရီက ယင်းပွဲမတိုင်မီ တစ်ပတ်အလိုတွင်ကစားမည့် FA ဖလားဆီမီးဖိုင်နယ်ပွဲစဉ်များကိုလည်း အတုယူလေ့လာသွားမည်ဟု ဆိုခဲ့သည်။
