မန်ယူနည်းပြ တန်ဟက်ဂ်က အက်စတွန်ဗီလာအသင်းကို အနိုင်ရသည့် လိဂ်ဖလားပွဲစဉ်တွင် လူစားဝင်ကစားပြီး ခြေစွမ်းပြခဲ့သည့် အသင်းလူငယ်တိုက်စစ်ကစားသမား ဂနာချိုအား ပွဲထွက်ခွင့်ရရန်အတွက် အစွမ်းကုန်ကြိုးစားရန် တိုက်တွန်းပြောကြားခဲ့သည်။
နိုဝင်ဘာ ၁၀ ရက်က ကစားခဲ့သည့် လိဂ်ဖလား တတိယအဆင့်ပွဲစဉ် မန်ယူ(၄-၂) အက်စတွန်ဗီလာပွဲ၌ ဂနာချိုသည် ပွဲချိန် ၆၂ မိနစ်တွင် မာစီယဲလ်အစား လူစားဝင်ကစား ခဲ့ပြီး ၇၈ မိနစ်တွင် ဘရူနိုဖာနန်ဒက်စ်၊ ၉၀+၁ မိနစ်တွင် တွမ်မီနေးတို့၏ သွင်းဂိုးများကို ဖန်တီးပေးနိုင်ခဲ့သည်။
အဆိုပါပွဲစဉ်တွင် လူစားဝင်ပြီး ဂိုးဖန်တီးမှု နှစ်ကြိမ်ပြုလုပ်ကာ ခြေစွမ်းပြခဲ့သည့် အသက် ၁၈ နှစ်အရွယ်ရှိ အာဂျင်တီးနားလူငယ်တိုက်စစ်ကစားသမား ဂနာချိုအား မန်ယူအသင်းပရိသတ်များက လူမှုကွန်ရက်များတွင် ချီးကျူးခဲ့ကြသည်။ မန်ယူနည်းပြ တန်ဟက်ဂ်ကလည်း ယင်းပွဲမှ ဂနာချို၏ စွမ်းဆောင်မှုကို ချီးကျူးခဲ့ပြီး ပွဲထွက်ခွင့်ရရန်အတွက် စိတ်နေသဘောထားပြောင်းရန်လိုကြောင်းနှင့် အစွမ်းကုန်ကြိုးစားရန် လိုအပ်ကြောင်း ပြောကြားခဲ့ခြင်းဖြစ်သည်။
တန်ဟက်ဂ်က “ဂနာချိုအနေနဲ့ လူစားဝင်ကစားပြီး အခုလိုစွမ်းဆောင်ပြခဲ့တာ အရမ်းကို ကောင်းပါတယ်။ သူဟာ ဂိုးဖန်တီးမှုတွေ ပြုလုပ်နိုင်ခဲ့သလို လိမ်ခေါက်ကျော်ဖြတ်တာတွေလည်း လုပ်နိုင်ခဲ့တယ်။ သူ့အနေနဲ့ တိုးတက်ဖို့လိုနေသေးတဲ့ အပိုင်းတွေတော့ ရှိသလို လေ့လာသင်ယူမှုတွေလည်း လုပ်ရဦးမှာပါ။ ဒါပေမဲ့ ဂနာချိုရဲ့ တိုးတက်မှုနဲ့ စွမ်းဆောင်မှုတွေအတွက် ကျွန်တော်တို့ ပျော်ပါတယ်။ မန်ယူအသင်းမှာ ပွဲကစားခွင့်တွေ အများကြီးရဖို့၊ ပွဲထွက်ခွင့်ရဖို့ဆိုတာကတော့ သူ့အပေါ်မှာ မူတည်ပါတယ်။ သူ့အနေနဲ့ အစွမ်းကုန်ကြိုးစားမယ်ဆိုရင် ပွဲကစားခွင့်တွေ ပိုရလာမှာပါ။ သူ့အနေနဲ့ ကစားသမားဘဝ တိုးတက်ဖို့အတွက် စိတ်နေသဘောထားနဲ့ လူနေမှုဘဝကို ပြင်ဆင်ဖို့လိုပါတယ်။ သူ့မှာ အဲဒီလိုလုပ်နိုင်စွမ်းရှိပါတယ်”ဟု ပြောကြားခဲ့သည်။
အက်သလက်တီကိုမက်ဒရစ်အကယ်ဒမီထွက် ဂနာချိုသည် ၂၀၂၀ ပြည့်နှစ်တွင် မန်ယူအကယ်ဒမီသို့ ပြောင်းရွှေ့ခဲ့ပြီး ပြီးခဲ့သည့် ၂၀၂၁-၂၂ ရာသီတွင် မန်ယူအသင်း အတွက် ပရော်ဖက်ရှင်နယ်ကစားသမားအ ဖြစ် ပွဲထွက်ခွင့်ရခဲ့သူဖြစ်သည်။ ၎င်းသည် လက်ရှိနည်းပြ တန်ဟက်ဂ်လက်ထက်တွင် ပွဲကစားခွင့် ပိုမိုရရှိနေပြီး နိုဝင်ဘာ ၃ ရက်က ကစားခဲ့သည့် ဆိုစီဒက်နှင့် ယူရိုပါလိဂ်အဝေး ကွင်းပွဲစဉ်တွင် မန်ယူအသင်းအတွက် ပထမဆုံးဂိုးကို သွင်းယူပေးနိုင်ခဲ့သည်။
ဂနာချိုသည် ယခုရာသီတွင် မန်ယူအသင်းအတွက် ပြိုင်ပွဲစုံ ခုနစ်ပွဲတွင် တစ်ဂိုးသွင်းယူထားသည်။ အက်စတွန်ဗီလာနှင့်ပွဲတွင် ခြေစွမ်းပြပြီးနောက် မန်ယူပရိသတ်များက ဂနာချိုအား ပွဲထွက်ကစားသမားအဖြစ် အသုံးပြုရန် အလိုရှိနေကြောင်း သိရသည်။
 အက်စတွန်ဗီလာပွဲ၌ ဂနာချိုသည် ပွဲချိန် ၆၂ မိနစ်တွင် မာစီယဲလ်အစား လူစားဝင်ကစား ခဲ့ပြီး ၇၈ မိနစ်တွင် ဘရူနိုဖာနန်ဒက်စ်၊ ၉၀+၁ မိနစ်တွင် တွမ်မီနေးတို့၏ သွင်းဂိုးများကို ဖန်တီးပေးနိုင်ခဲ့သည်။){kind=link}