နယူးကာဆယ်အသင်း၏နည်းပြ အက်ဒီဟောင်းက လိဂ်ဖလားဆီမီးဖိုင်နယ်အဆင့်သို့ တက်ရောက်နိုင်ခဲ့ခြင်းမှာ ဂုဏ်ယူစရာဖြစ်သော်လည်း မိမိတို့အတွက် လုံလောက်သည့် အဆင့်မဟုတ်ဟု ပြောကြားခဲ့သည်။
နယူးကာဆယ်အသင်းသည် ယခုရာသီတွင် အကောင်းဆုံးခြေစွမ်းပြလျက်ရှိပြီး ပရီးမီးယားလိဂ်ပြိုင်ပွဲ၌ အမှတ်ပေးဇယားတတိယနေရာတွင် ရပ်တည်နေသလို၊ လိဂ်ဖလားပြိုင်ပွဲတွင်လည်း ဆီမီးဖိုင်နယ်အဆင့်သို့ တက်ရောက်နိုင်ခဲ့ခြင်းဖြစ်သည်။
နယူးကာဆယ်အသင်းသည် လိဂ်ဖလားဆီမီးဖိုင်နယ်တွင် ဆောက်သမ်တန်အသင်းနှင့် ဆုံတွေ့နေပြီး အခြားဆီမီးဖိုင်နယ်ပွဲစဉ်တွင် မန်ယူနှင့် နော်တင်ဟမ်ဖောရက်စ်အသင်းတို့ ဆုံတွေ့နေသည်။
ထို့ကြောင့် နယူးကာဆယ်နှင့် မန်ယူအသင်းတို့ ဗိုလ်လုပွဲတွင် ဆုံတွေ့ရရန်လည်း ရေပန်းစားနေသည်။
ယင်းအခြေအနေတွင် အက်ဒီဟောင်းက ”ကျွန်တော်တို့ ရောက်နေတဲ့နေရာက ဂုဏ်ယူကျေနပ်စရာ ကောင်းပါတယ်။ ဒါပေမဲ့ ဆီမီးဖိုင်နယ်ဆိုတာ ကျွန်တော်တို့အတွက် လုံလောက်တဲ့အဆင့် မဟုတ်ပါဘူး။ ဗိုလ်လုပွဲကို မတက်ရောက်နိုင်ဘူးဆိုရင် ဆီမီးဖိုင်နယ်ဆိုတာ ဘာအဓိပ္ပာယ်မှ မရှိပါဘူး။ ကျွန်တော်တို့ နောက်တစ်ဆင့် ထပ်တက်ချင်ပါတယ်။ ကစားသမားတွေကလည်း တူညီတဲ့သဘောထား ရှိနေမယ်ဆိုတာ ကျွန်တော် သိပါတယ်”ဟု ပြောကြားခဲ့သည်။
နယူးကာဆယ်အသင်းသည် လိဂ်ဖလားပြိုင်ပွဲ၏ ဆီမီးဖိုင်နယ်အဆင့်သို့ ၁၉၇၅-၇၆ ရာသီက နောက်ဆုံးရောက်ရှိခဲ့ပြီး အက်ဒီဟောင်းမှာ ၁၉၇၇ ခုနှစ်မှ မွေးဖွားခဲ့သူဖြစ်ကြောင်း သိရသည်။
