စတုတ်စီးတီး – စပါး (မြန်မာစံတော်ချိန် ဒီဇင်ဘာ ၂၃ ရက် ည ၁၂:၀၀ နာရီ)
စပါးနည်းပြ မော်ရင်ဟိုက ချယ်လ်ဆီး၊ မန်ယူအသင်းတွေကို ကိုင်တွယ်ချိန်မှာ ဖလားအောင်မြင်မှုကို လိဂ်ဖလားနဲ့ စတင်နိုင်ခဲ့တာကို ထည့်တွက်သင့်ပါတယ်။ စတုတ်ကတော့ လိဂ်ဖလားထက် တန်းတက်ခွင့်အိပ်မက်က ပိုဆွဲဆောင်မှုရှိနေလို့ ဖောင်ဖျက်ကစားမယ်မထင်ဘူး။ စပါး ဂိုးပြတ်၊ မပြတ်ပဲကြည့်ရမှာပါ။
အဲဗာတန် – မန်ယူ (မြန်မာစံတော်ချိန် ဒီဇင်ဘာ ၂၄ ရက် နံနက် ၂:၃၀ နာရီ)
မန်ယူအသင်းနည်းပြ ဆိုးလ်ရှားက အစောပိုင်းအဆင့်ပွဲတွေမှာ အရန်ကစားသမားအများစုကို ပွဲထွက်အသုံးပြုပြီး ဒီအဆင့်ကို ရောက်လာတာပါ။ ဒါပေမဲ့ လက်ရှိ ဆိုးလ်ရှားရဲ့အနာဂတ်ကလည်း အာတီတာထက် အနည်းငယ်သာရုံလေး အနေအထားဖြစ်လို့ အမှားအယွင်းဖြစ်လို့ မရပါဘူး။ ချန်ပီယံလိဂ်ပြိုင်ပွဲက ထွက်ထားရလို့ နောက်ထပ်ဖလားတစ်လုံးပါ ဆုံးရှုံးလိုက်ရရင် ဆိုးလ်ရှားအတွက် အလားအလာမကောင်းတော့တာ ထည့်တွက်ရမယ်။ အဲဗာတန်က ချယ်လ်ဆီး၊ လက်စတာနဲ့ အာဆင်နယ်အသင်းတွေကို အနိုင်ကစားပြီး ရာသီအစကလို ယုံကြည်မှုမျိုး ပြန်ရလာတယ်။ အဲဗာတန်နည်းပြ အန်ဆယ်လော့တီက အစောပိုင်းအဆင့်ပွဲတွေမှာလည်း လူစုံနီးပါးအသုံးပြုခဲ့လို့ ဒီပွဲမှာလည်း ကစားသမားပိုင်း အနည်းငယ်လောက်ပဲ အပြောင်းအလဲလုပ်ဖို့များတယ်။ ဒီရာသီ အဲဗာတန်ကွင်းမှာ မန်ယူ အနိုင်ကစားထားပေမဲ့ အိမ်ရှင်အသင်း ခြေစွမ်းယိုင်သွားချိန်ဖြစ်တာ သတိပြုရမယ်။ အဲဗာတန်ကို ပိုကြိုက်တယ်။
