စပါးအသင်းနည်းပြ မော်ရင်ဟိုက မြောက်လန်ဒန်ဒါဘီပြိုင်ဘက် အာဆင်နယ်အသင်း၏အထက်တွင် ရပ်တည်နိုင်ရေးထက် ယူရိုပါလိဂ်ဝင်ခွင့်ရရန် မျှော်မှန်းထားကြောင်း ပြောကြားသည်။
အာဆင်နယ်အသင်းအား အိမ်ကွင်း၌ (၂-၁) ဂိုးဖြင့် အနိုင်ရသည့် လန်ဒန်ဒါဘီပွဲအပြီးတွင် မော်ရင်ဟိုက ယခုလိုပြောကြားခြင်းဖြစ်ပြီး ယူရိုပါလိဂ်၌ကစားရခြင်းကို သဘောမကျသော်လည်း တတိယအကြိမ် ယှဉ်ပြိုင်ကစား၍ တတိယမြောက်ဆုဖလား ရယူသွားမည်ဟု ဆိုသည်။
”အာဆင်နယ်ရဲ့ အထက်မှာ နေချင်တယ်ဆိုတာက ပရိသတ် တွေရဲ့အမြင်ပါ။ ကျွန်တော့်ဆီမှာ အဲဒီဟာထက်ပိုကြီးတဲ့ ရည်မှန်းချက်တွေရှိပါတယ်။ ရာသီအစကတည်းကသာ ကျွန်တော်ရောက် နေမယ်ဆိုရင် ပြဿနာတွေအားလုံးရှိနေရင်တောင် အဆင့် ၄ ဒါမှမဟုတ် ၅ နေရာ ရပ်တည်နိုင်မယ်ထင်တယ်လို့ပြောရင် တစ်ကိုယ်ကောင်းဆန်ရာကျလိမ့်မယ်လို့ ပြောဖူးပါတယ်။ ဒါပေမဲ့ ကျွန်တော်က တစ်ကိုယ်ကောင်းဆန်တဲ့သူ မဖြစ်ချင်သလို ပရိသတ်တစ်ယောက်လိုလည်း မဖြစ်ချင်ပါဘူး။ ယူရိုပါလိဂ်မှာကစားရတာကို ကျွန်တော်သဘောကျပါတယ်။ ဒီ ပြိုင်ပွဲက ကျွန်တော်နှစ်သက်တဲ့ ပြိုင်ပွဲမဟုတ်ပေမဲ့ ချန်ပီယံလိဂ်ကစားလို့မရဘူးဆိုရင်တော့ ယူရိုပါလိဂ်ပဲ ကစားရမှာပါ။ ဒီပြိုင်ပွဲမှာ နှစ်ကြိမ်ကစားဖူးပြီး နှစ်ကြိမ်စလုံး အနိုင်ရဖူးပါတယ်။ တတိယအကြိမ်ကစားပြီးတော့ တတိယမြောက်ဆုဖလားယူရတာလည်း သိပ်တော့မဆိုးပါဘူး”ဟု မော်ရင်ဟိုက ပြောကြားသည်။
ဒါဘီပွဲအနိုင်ရလဒ်ကြောင့် ၃၅ ပွဲကစားအပြီးတွင် စပါးအသင်းက အာဆင်နယ်ထက် နှစ်မှတ်အသာ ၅၂ မှတ်ဖြင့် အဆင့် ၈ နေရာ ရောက်ရှိလာပြီး ယူရိုပါလိဂ်ဝင်ခွင့် အဆင့် ၆ နေရာမှ ဝုလ်ဗ်အသင်းနှင့် သုံးမှတ်သာ ကွာဟနေကြောင်း သိရသည်။
