ယခုနွေရာသီအပြောင်းအရွှေ့ကာလတွင် အသင်းပြောင်းရွှေ့ဖွယ်ရှိသည်ဟု သတင်းထွက်နေသည့် PSG အသင်းတိုက်စစ်မှူး ဘာပေအနေဖြင့် ၂၀၂၁-၂၂ ရာသီတွင် PSG အသင်း၌ ဆက်ရှိနေမည်ဖြစ်ကြောင်း ပြင်သစ်သတင်းစာ Le Parisien က အခိုင်အမာဖော်ပြခဲ့သည်။
အသက် (၂၂)နှစ်အရွယ်ရှိ နာမည်ကျော်ပြင်သစ်တိုက်စစ်မှူး ဘာပေသည် ၂၀၂၂ ဇွန်လ (၃၀)ရက်တွင် PSG အသင်းနှင့် စာချုပ်သက်တမ်းကုန်ဆုံးမည်ဖြစ်ပြီး PSG အသင်းက စာချုပ်သက်တမ်းတိုးရန် ကြိုးစားနေသော်လည်း ကစားသမားဘက်က ငြင်းဆန်ထားကြောင်း သိရသည်။
ထို့ကြောင့် ဘာပေအနေဖြင့် ယခုနွေရာသီတွင် PSG အသင်းမှထွက်ခွာဖွယ်ရှိနေပြီး ၎င်းကိုခေါ်ယူရန် ကာလရှည်ပစ်မှတ်ထားနေသည့် စပိန်ထိပ်သီး ရီးယဲလ်အသင်းသို့ ပြောင်းရွှေ့ဖွယ်ရှိသည်ဟု သတင်းများထွက်ပေါ်နေသည်။
ထို့ပြင် PSG အသင်းနည်းပြ ပိုချက်တီနီကလည်း ဘာပေအနေဖြင့် လာမည့်ရာသီတွင် PSG အသင်း၌ ဆက်ရှိ၊ မရှိကို မိမိ မပြောနိုင်ကြောင်း ပြောကြားခဲ့သည်။
PSG အသင်းအနေဖြင့် ဘာပေကို စာချုပ်သစ်ချုပ်ဆိုနိုင်ခြင်းမရှိပါက လာမည့် ၂၀၂၂ နွေရာသီတွင် ပြောင်းရွှေ့ကြေးအလွတ်ဖြင့် လက်လွှတ်ရမည်ဖြစ်ပြီး PSG အသင်းသည် အဆိုပါအဖြစ်မျိုးကိုရှောင်လွှဲနိုင်ရန် ယခုနွေရာသီအပြောင်းအရွှေ့ကာလတွင် ၎င်းကို ရောင်းချဖွယ်ရှိနေသည်ဟုလည်း သတင်းများထွက်ပေါ်နေသည်။
သို့သော် Le Parisien က ဘာပေ၏အပြောင်းအရွှေ့မှာ ယခုနွေရာသီတွင် ဖြစ်လာမည်မဟုတ်ဟု ဖော်ပြခဲ့ခြင်းဖြစ်သည်။
”စပိန်မီဒီယာတွေက ဒီနွေမှာ ဘာပေ အသင်းပြောင်းမယ်ဆိုပြီး ဖော်ပြနေကြတယ်။ ဒါတွေက မမှန်ပါဘူး။ ဘာပေဟာ ဒီရာသီမှာ PSG အသင်းမှာပဲ ဆက်ကစားမှာပါ”ဟု Le Parisien က ရေးသားဖော်ပြခဲ့သည်။
