ဒီပွဲဟာ ပရီးမီးယားလိဂ်မှာ နောက်ဆုံး(၇)ပွဲဆက်နိုင်ပျောက်ထားပြီး နောက်ဆုံး (၁၀)ပွဲမှာ (၁)ပွဲသာနိုင်ထားလို့ ရာထူးကထုတ်ပယ်ဖို့ရေပန်းအစားဆုံးဖြစ်နေတဲ့ အာဆင်နယ်နည်းပြအာတီတာအတွက် ဒီနိုင်ပွဲရလဒ်ကအပြုသဘောဆောင်တဲ့ အလှည့်အပြောင်းဖြစ်သွားနိုင်သလို၊ ချယ်လ်ဆီးနည်းပြလမ်းပတ်အတွက်လည်း ဒီရှုံးပွဲက ဖိအားတွေနဲ့အတူ အဆိုးဆုံးအခြေအနေတစ်ခုဆီ ရောက်ရှိသွားနိုင်ပါတယ်။
တကယ်ကိုမထင်မှတ်ထားတဲ့ရလဒ်လို့ပဲဆိုရပါမယ်။ အသင်းကြီး (၂)သင်း၊ လန်ဒန်ဒါဘီပြိုင်ဘက် (၂)သင်းထိပ်တိုက်တွေ့တဲ့ပွဲဆိုပေမယ့် ပွဲမစခင်အခြေအနေအရဆို အာဆင်နယ်အသင်းအခုလိုမျိုးသက်သောင့်သက်သာနဲ့အနိုင်ယူမယ်၊ ချယ်လ်ဆီးအသင်းက မိနစ် (၈၀)ကျော်အထိ ဂိုးပေါက်တည့်ကန်ချက်မရှိလောက်အောင် ဆိုးရွားမယ်လို့ ထင်မှတ်မထားတာအမှန်ပါ။
ဒီပွဲဟာ ပရီးမီးယားလိဂ်မှာ နောက်ဆုံး(၇)ပွဲဆက်နိုင်ပျောက်ထားပြီး နောက်ဆုံး (၁၀)ပွဲမှာ (၁)ပွဲသာနိုင်ထားလို့ ရာထူးကထုတ်ပယ်ဖို့ရေပန်းအစားဆုံးဖြစ်နေတဲ့ အာဆင်နယ်နည်းပြအာတီတာအတွက် ဒီနိုင်ပွဲရလဒ်ကအပြုသဘောဆောင်တဲ့ အလှည့်အပြောင်းဖြစ်သွားနိုင်သလို၊ ချယ်လ်ဆီးနည်းပြလမ်းပတ်အတွက်လည်း ဒီရှုံးပွဲက ဖိအားတွေနဲ့အတူ အဆိုးဆုံးအခြေအနေတစ်ခုဆီ ရောက်ရှိသွားနိုင်ပါတယ်။
ချယ်လ်ဆီးနည်းပြလမ်းပတ်ဟာ ဒီနေ့ပွဲမှာ အေဘရာဟမ်၊ ဗာနာ၊ ပူလီဆစ်တို့နဲ့ အသင်းရဲ့တိုက်စစ်ကိုတွဲဖက်ခဲ့ပြီး မေဆန်မောင့်၊ ကွန်တေ၊ ကိုဗာချစ်တို့နဲ့ လူစုံစုဖွဲ့ခဲ့တာပါ။ ဒါ့အပြင် ခံစစ်အစွန် (၂)ဖက်မှာလည်း ရီးစ်ဂျိမ်းစ်နဲ့ ဘန်ချီဝဲလ်တို့ပြန်လည်ပါဝင်နိုင်ခဲ့ပြီး ရလဒ်ကောင်းအတွက်မျှော်လင့်ချက်ထားစရာအခြေအနေဖြစ်ခဲ့ပါတယ်။
အူဘာမီယန်း၊ ဒေးဗစ်လူးဝစ်ဇ်၊ ဝီလီယံ၊ စီဘယ်ယို့စ်၊ ပါတေးတို့မပါဝင်နိုင်တဲ့အာဆင်နယ်အသင်းကတော့ ရိုဝီ၊ မာတင်နယ်လီ၊ ဆာကာ၊ ပါဘလိုမာရီ၊ တီယာနေးစတဲ့ လူငယ်ကစားသမားတွေ၊ အရန်ကစားသမားတွေကို စုဖွဲ့ပွဲထွက်ခဲ့ရတာပါ။
အံ့အားသင့်စရာကောင်းတာက ချယ်လ်ဆီးအသင်းရဲ့ ကစားပုံဟာ ပွဲအစပိုင်းမှာသာ လှုပ်လှုပ်ခတ်ခတ်ရှိခဲ့ပြီး ပွဲချိန်ကြာလာတာနဲ့အမျှ အာဆင်နယ်အသင်းရဲ့ ကစားကွက်အောက်ကို တဖြည်းဖြည်းရောက်သွားခဲ့ပါတယ်။
အထူးသဖြင့် အသင်းခေါင်းဆောင်ပီသတဲ့ဦးဆောင်မှုကိုပြနိုင်ခဲ့တဲ့ ဘယ်လာရင်၊ ဗဟိုခံစစ်အတွဲအဖြစ်ကစားခဲ့တဲ့ ပါဘလိုမာရီနဲ့ ဟိုးလ်ဒင်း၊ တောင်ပံတိုက်စစ်(၂)ဖက်က ဆာကာနဲ့ မာတင်နယ်လီတို့ရဲ့ စွမ်းဆောင်ရည်ကောင်းတွေက အာဆင်နယ်အသင်းအတွက် ထိုက်တန်တဲ့ဂိုးပြတ်နိုင်ပွဲတစ်ပွဲကို ပုံဖော်ပေးခဲ့ပါတယ်။
လူငယ်အများစုနဲ့ပွဲထွက်ခဲ့ရပေမယ့် အာဆင်နယ်နည်းပြ အာတီတာဟာ ပွဲအခြေအနေကို ကောင်းကောင်းသုံးသပ်နိုင်ခဲ့ပြီး ဒီနေ့ပွဲမှာ အထလေးနေတဲ့ ချယ်လ်ဆီးအသင်းရဲ့ ခံစစ်အစွန်တွေကို တောက်လျှောက်ဖိအားပေးပြီး အခွင့်အရေးတွေဖန်တီးခဲ့တာပါ။
ချယ်လ်ဆီးတိုက်စစ်မှူးဗာနာဟာ ကြိုးစားမှုကိုအသိအမှတ်ပြုရမှာဖြစ်ပေမယ့် ထိပ်တန်းတိုက်စစ်မှူးတစ်ဦးအတွက် ဂိုးတွေနဲ့ဝေးကွာတာကြာလေလေ ယုံကြည်မှုပျောက်လေလေပါပဲ။ ဒီနေ့ပွဲမှာလည်း ဗာနာဟာ ပြေးလွှားကစားနေတာကလွဲလို့ တိုက်စစ်လမ်းကြောင်းတွေကို မရှာဖွေနိုင်သလို၊ အခွင့်အရေးတွေလည်း မဖန်တီးနိုင်ခဲ့ပါဘူး။
အာဆင်နယ်ခံစစ်က မာမာထန်ထန်တုံ့ပြန်မှုအောက်မှာ ပူလီဆစ်၊ အေဘရာဟမ်တို့လည်း ဖိအားများခဲ့ရပြီး ကိုဗာချစ်၊ မေဆန်မောင့်တို့ရဲ့ ကွင်းလယ်ကလည်း ဘောလုံးအပျက်များနေလို့ တိုက်စစ်အတွက် အထောက်အပံ့မဖြစ်ခဲ့တာပါ။
အာဆင်နယ်အသင်းကစားသမားတွေဟာ နေရာစုံမှာတာဝန်ကျေခဲ့ကြပြီး လန်ဒန်ဒါဘီပွဲဖြစ်နေတာ၊ လက်ရှိအမှတ်ပေးဇယားရပ်တည်မှုအရ မဖြစ်မနေနိုင်ပွဲယူရမယ်ဆိုတဲ့ ရုန်းကန်လာမှုတွေကိုလည်းတွေ့ခဲ့ရပါတယ်။
အာဆင်နယ်အသင်းရဲ့ ခံစစ်ကအမှားမရှိခဲ့သလို၊ တိုက်စစ်ကလည်း လျှင်မြန်တဲ့တွဲလုံးတွေနဲ့ ချယ်လ်ဆီးခံစစ်ကိုနေရာစုံကဖိအားပေးပြီး ဂိုးတွေရယူသွားခဲ့ပါတယ်။
ချယ်လ်ဆီးနည်းပြလမ်းပတ်အတွက်တော့ မေးခွန်းထုတ်စရာများတဲ့ပွဲဖြစ်ခဲ့ပြီး ရလဒ်တွေဆိုးနေတဲ့၊ ယုံကြည်မှုပျောက်နေတဲ့ အဓိက ကစားသမားတွေမပါနိုင်တဲ့ အာဆင်နယ်အသင်းကို ဘယ်လိုတုံ့ပြန်ရမှန်းမသိတဲ့ အခြေအနေမျိုးဖြစ်တဲ့အထိကို ရုပ်ပျက်လွန်းခဲ့ပါတယ်။
လမ်းပတ်အနေနဲ့ ကစားသမားတွေ၊ ရှိရင်းစွဲကစားသမားတွေကြားက နားလည်မှုနဲ့ အပြန်အလှန်သက်ရောက်မှုကို အခုအချိန်အထိမရှာဖွေနိုင်သေးဘူးလို့ပဲသုံးသပ်ရမှာပါ။ ဒီအခြေအနေဟာ သူ့ရဲ့ ချယ်လ်ဆီးနည်းပြဘဝအနာဂတ်ကိုပါ ကြီးကြီမားမားသက်ရောက်မှုတွေရှိလာနိုင်ပါတယ်။
ဒီပွဲရဲ့ အလှည့်အပြောင်းဖြစ်တဲ့အခိုက်အတန့်ကတော့ အာဆင်နယ်အသင်းရဲ့အဖွင့်ဂိုးလို့ပဲပြောရပါမယ်။ ချယ်လ်ဆီးနောက်ခံလူ ရီးစ်ဂျိမ်းစ်ရဲ့မပါးနပ်မှုကတစ်ဆင့် အာဆင်နယ်အသင်း ပယ်နယ်တီကန်သွင်းခဲ့ရရှိခဲ့ပြီး ဒီပယ်နယ်တီကို ပွဲချိန် (၃၄)မိနစ်မှာ လာကာဇက်က အမှားအယွင်းမရှိကန်သွင်းယူကာ ဦးဆောင်နိုင်ခဲ့ပါတယ်။
ဂိုးပေးလိုက်ရပေမယ့် ချယ်လ်ဆီးအသင်းရဲ့ကစားပုံကအားရစရာမဖြစ်ခဲ့သလို၊ ချေပဂိုးတွေရဖို့ လုံလောက်တဲ့အားထုတ်မှုမျိုးကိုလည်းမပြနိုင်ခဲ့ပါဘူး။ နောက်ထပ် (၁၀)မိနစ်အကြာ ပွဲချိန် (၄၄)မိနစ်မှာတော့ အာဆင်နယ်အသင်းဒုတိယဂိုးရရှိခဲ့ပါတယ်။
ဒီဂိုးကိုတော့ ကွင်းလယ်လူ ချာကာက ပြစ်ဒဏ်ဘောကနေတစ်ဆင့် လှလှပပတိုက်ရိုက်ကန်သွင်းယူခဲ့တာပါ။ ပထမပိုင်းမှာတော့ (၂-ဝ)ဂိုးနဲ့ပဲပြီးဆုံးခဲ့ပြီး ဒုတိယပိုင်းမှာလည်း အနိုင်ရနေတဲ့ အာဆင်နယ်အသင်းကပဲ ပိုကောင်းတဲ့ပုံစံကိုပြနိုင်ခဲ့ပါတယ်။
ချယ်လ်ဆီးနည်းပြလမ်းပတ်က ဒုတိယပိုင်းအစမှာပဲ အိုဒွိုင်း၊ ဂျော်ဂျင်ဟိုတို့ကိုထည့်သွင်းကာ ကစားပုံအပြောင်းအလဲလုပ်ခဲ့ပေမယ့် ချယ်လ်ဆီးအသင်းရဲ့ ကွင်းတွင်းစွမ်းဆောင်ရည်ကတိုးတက်မလာခဲ့ပါဘူး။
အာဆင်နယ်အသင်းကပဲ အခွင့်အရေးများစွာနဲ့အတူ တောက်လျှောက်ဖိအားပေးနိုင်ခဲ့ပြီး (၅၆)မိနစ်မှာပဲ ဆာကာကလှပတဲ့ကန်သွင်းချက်နဲ့ တတိယဂိုးကိုသွင်းယူပေးခဲ့ပါတယ်။
(၃-ဝ)ဂိုးအနေအထားမှာ အာဆင်နယ်အသင်း နောက်ထပ်အခွင့်အရေးတွေဆက်တိုက်ရခဲ့ပြီး ချယ်လ်ဆီးအသင်းရဲ့ ခံစစ်နဲ့ ဂိုးသမားမန်ဒီတို့ကတော့ တစ်ချိန်တုန်းအလုပ်ရှုပ်ခဲ့ရတာပါ။
ဒီရလဒ်အတိုင်းပွဲပြီးဖို့နီးစပ်ခဲ့ပေမယ့် ပွဲချိန် (၈၅)မိနစ်မှာတော့ အိုင်ဒွိုင်းရဲ့ပေးပို့မှုကနေ အေဘရာဟမ်က ချယ်လ်ဆီအသင်းအတွက် တစ်လုံးတည်းသောချေပဂိုးကိုသွင်းယူပေးခဲ့ပါတယ်။
ဆက်တိုက်ဆိုသလိုပဲ ပွဲချိန်မိနစ် (၉၀)မှာ ချယ်လ်ဆီးအသင်း ပယ်နယ်တီကန်ခွင့်ရခဲ့ပေမယ့် ဒီပယ်နယ်တီကို ဂျော်ဂျင်ဟိုကန်သွင်းရာမှာ အာဆင်နယ်ဂိုးသမားလေနိုင်ကာကွယ်နိုင်ခဲ့လို့ ချယ်လ်ဆီးအသင်းအတွက် နစ်နာခဲ့ရပါတယ်။
လက်ကျန်နာကျင်အချိန်ပိုမှာတော့ အာဆင်နယ်အသင်းက အနိုင်ဂိုးတွေကို သက်သောင့်သက်သာထိန်းကစာသွားခဲ့လို့ ပွဲအပြီးမှတော့ (၃-၁)ဂိုးနဲ့အနိုင်ရခဲ့ပါတယ်။ ဒာာဆင်နယ်အသင်းကတော့ ပရီးမီးယားလိဂ်နောက်ဆုံး (၁၄)ပွဲမှာ ပထမဆုံးအကြိမ်အဖြစ် တစ်ပွဲတည်း သွင်းဂိုး (၃)ဂိုးသွင်းယူနိုင်ခဲ့တာဖြစ်သလို၊ ရလဒ်ဆိုးတွေ၊ ဖိအားတွေကနေလည်း သက်သာရာရခဲ့တယ်လို့ဆိုရပါလိမ့်မယ်။
