မန်ယူအသင်းသည် ပြင်သစ်တိုက်စစ်မှူး မာစီယဲလ်ကို အငှားချရန် စီစဉ်နေသော်လည်း လစာအပြည့်ပေးမည့်အသင်းထံသာ အငှားချရန် ဆန္ဒရှိနေကြောင်း သိရသည်။
မန်ယူအသင်းသည် ၂၀၁၉ ဇန်နဝါရီလအတွင်းက မာစီယဲလ်ကို ၂၀၂၄ ခုနှစ်အထိ သက်တမ်းတိုးစာချုပ် ချုပ်ဆိုခဲ့ပြီး တစ်နှစ်သက်တမ်းထပ်တိုးနိုင်သည့် သဘောတူညီမှုလည်း ရယူခဲ့သည်။
အဆိုပါစာချုပ်သစ်အရ မာစီယဲလ်သည် မန်ယူအသင်းတွင် တစ်ပတ်ပေါင်(၂၅၀၀၀၀)ဝန်းကျင် ရရှိနေကြောင်း သိရသည်။
ယင်းကဲ့သို့ မြင့်မားသည့် လစာနှုန်းထား ပေးနေရသည့် ကစားသမားကို နည်းပြများက နေရာပေးအသုံးပြုနိုင်ခြင်းမရှိသည့်အတွက် မန်ယူအသင်းက ပြန်လည်အငှားချရန် လိုလားနေသည်။
မာစီယဲလ်(၂၆ နှစ်)ကို ခေါ်ယူလိုသည့် အသင်းများစွာရှိသော်လည်း လစာတစ်ဝက်သာ ပေးချေလိုသည့်အတွက် အပြောင်းအရွှေ့ ဖြစ်မလာသေးခြင်းဖြစ်ကြောင်းလည်း သိရသည်။
မန်ယူအသင်းသည် မာစီယဲလ်အတွက် ငှားရမ်းခအပြင် လစာအပြည့် ပေးမည့်အသင်းထံသာ အငှားချရန် လိုလားနေခြင်းဖြစ်ကြောင်း သိရသည်။
မာစီယဲလ်သည် ၂၀၁၅ နွေရာသီတွင် မိုနာကိုအသင်းမှ မန်ယူအသင်းထံ ပေါင်(၃၆)သန်းဖြင့် ပြောင်းရွှေ့ခဲ့သူဖြစ်ပြီး ပြိုင်ပွဲစုံ(၂၆၈)ပွဲကစားကာ (၇၉)ဂိုး သွင်းယူပေးထားသည်။
ယခုရာသီတွင်မူ ပြိုင်ပွဲစုံ(၁၀)ပွဲကစားပြီး (၁)ဂိုးသာ သွင်းယူနိုင်ခဲ့သည်။
မာစီယဲလ်သည် ယခုဇန်နဝါရီအပြောင်းအရွှေ့ကာလအတွင်း ဆီဗီလာအသင်းထံ ရောက်ရှိလိမ့်မည်ဟု သတင်းထွက်ခဲ့သော်လည်း ယခုအခါ ခီယေဆာကို ရာသီကုန်အထိ အနားပေးရမည့် ဂျူဗင်တပ်စ်အသင်းကလည်း ၎င်းကို ခေါ်ယူရန် ဆွေးနွေးနေကြောင်း သိရသည်။
