ရီးယဲလ်တိုက်စစ်မှူး ဘန်ဇီမာက ချန်ပီယံလိဂ်ဗိုလ်လုပွဲတွင် ရင်ဆိုင်ရမည့် လီဗာပူးလ်တိုက်စစ်ကစားသမား ဆာလာ၏ လက်စားချေမည်ဟု ပြောဆိုမှုကို ပြန်လည်တုံ့ပြန်ခဲ့ပြီး လီဗာပူးလ်ကစားသမားများ ယုံကြည်မှုအလွန်ရှိနေပုံရကြောင်း ပြောကြားခဲ့သည်။
လာမည့် စနေနေ့တွင် ချန်ပီယံလိဂ်ဗိုလ်လုပွဲအဖြစ် ကစားကြမည့် ရီးယဲလ်နှင့် လီဗာပူးလ်တို့သည် ၂၀၁၈ ခုနှစ်ကလည်း ချန်ပီယံလိဂ်ဗိုလ်လုပွဲတွင် တွေ့ဆုံခဲ့ဖူးပြီး ရီးယဲလ်အသင်းက (၃-၁) ဂိုးဖြင့် အနိုင်ရခဲ့သည်။
ထို့ကြောင့် လီဗာပူးလ်တိုက်စစ်ကစားသမား ဆာလာက ရီးယဲလ်အသင်းကို လက်စားချေမည်ဆိုသော စကားမျိုးပြောဆိုခဲ့ရာ ဘန်ဇီမာက လီဗာပူးလ်အသင်းသည် ပွဲမကစားရခင်ကတည်းက နိုင်ပြီဟု အထင်ရောက်နေပုံရကြောင်း တုံ့ပြန်ခဲ့ခြင်းဖြစ်သည်။
ဘန်ဇီမာက ”လီဗာပူးလ်က အတော်လေးယုံကြည်မှု ရှိနေပုံရပါတယ်။ သူတို့က ဒီပွဲကို နိုင်ပြီးသားလို့တောင် အထင်ရောက်နေလိမ့်မယ်ထင်ပါတယ်။ သူတို့ဟာ ကျွန်တော်တို့က အရင်ရီးယဲလ်လို မဟုတ်တော့ဘူးလို့ ထင်နေပုံပါပဲ။ သူတို့က ရေပန်းပိုစားတယ်ပေါ့။ ဆာလာအနေနဲ့ သူပြောချင်တာကို ပြောနိုင်ပါတယ်”ဟု ပြောကြားခဲ့သည်။
