ပေါ်တူဂီအသင်းသည် လူဇင်ဘတ်ကို ၆-၀ ဖြင့်အနိုင်ရရှိခဲ့သလို ရော်နယ်ဒိုအနေဖြင့်လည်း နိုင်ငံအသင်းအတွက်ပါဝင်ကစားသည့် ပွဲအရေအတွက်နှင့် သွင်းဂိုးအရေအတွက်တို့ ထပ်မံတိုးလာခဲ့သည်။
ပြီးခဲ့သည့်ကြာသပတေးနေ့က လက်ချင်စတိုင်းကို ၄-၀ ဖြင့်အနိုင်ရရှိသည့်ပွဲအပြီးတွင် ရော်နယ်ဒိုသည် ပေါ်တူဂီအတွက်စုစုပေါင်း ၁၉၇ ပွဲပါဝင်ကစားကာ နိုင်ငံအသင်းအတွက် ပွဲအများဆုံး ပါဝင်ကစားသည့် ကစားသမားအဖြစ်စံချိန်တင်နိုင်ခဲ့သည်။
မနေ့ညက ကစားသည့် လတ်ဇင်ဘတ်နှင့်ပွဲတွင် ရော်နယ်ဒိုသည် နှစ်ဂိုးသွင်းပေးနိုင်ခဲ့ပြီး ၎င်း၏ နိုင်ငံတကာသွင်းဂိုးအရေအတွက်သည် စုစုပေါင်း ၁၂၂ ဂိုးအထိရှိလာခဲ့ပြီဖြစ်သည်။ ရော်နယ်ဒိုသည် ပွဲချိန် ၉ မိနစ်နှင့် ၃၁ မိနစ်တို့တွင် ပေါ်တူဂီအတွက်သွင်းဂိုးများသွင်းယူပေးနိုင်ခဲ့သည်။
ပေါ်တူဂီအတွက် အခြားဂိုးများကို ၁၅ မိနစ်တွင် ဂျာအိုဖိလစ်၊ ၁၈ မိနစ်တွင် ဘာနေဒိုဆေးဗား၊ ၇၇ မိနစ်တွင်အော့တာဗီယိုနှင့် ၈၉ မိနစ်တွင် ရာဖေးလီယိုတို့က သွင်းယူပေးခဲ့ခြင်းဖြစ်သည်။
ယခုပွဲစဉ်များ ကစားအပြီးတွင် နည်းပြချုပ်မာတီနက်ဇ်သည် ပေါ်တူဂီအသင်းကို စတင်ကိုင်တွယ်သည့် ပထမဆုံးနှစ်ပွဲတွင် သွင်းဂိုး ၁၀ ဂိုးရရှိပြီး ပေးဂိုးမပေးရခြင်းအဖြစ်လည်း မှတ်တမ်းဝင်သွားသည်။ ပေါ်တူဂီအသင်းသည် အုပ်စုဂျေတွင် အုပ်စုပထမနေရာတွင်ရပ်တည်နေပြီး ဒုတိယနေရာမှ ဆလိုဗက်ကီးယားထက် နှစ်မှတ်သာနေသည်။ လာမည့်ဇွန်လ ၁၇ ရက်နေ့တွင် ပေါ်တူဂီသည် အိမ်ကွင်းတွင် ဘော့စနီးယားအသင်းနှင့် ကစားရန်ရှိနေပြီး လူဇင်ဘတ်သည် အိမ်ကွင်းတွင် လက်ချင်စတိန်းအသင်းနှင့် ကစားရမည်ဖြစ်သည်။
