ရော်ဘတ်တိုမာတီနက်ဇ်ဟာ မနေ့ညက ဆလိုဗေးနီးယားကို ပင်နယ်တီ အဆုံးအဖြတ်နဲ့ အနိုင်ယူကာ ပေါ်တူဂီတို့ ကွာတားဖိုင်နယ် တက်ခဲ့တဲ့ ပွဲစဉ် အပြီးမှာ ခရစ်စတီယာနို ရော်နယ်ဒိုရဲ့ Character နဲ့ ဂိုးသမား ကော်စတာရဲ့ လက်စွမ်းပြခဲ့မှုကို ချီးကျူးသွားခဲ့ပါတယ်။ ယူရို ၂၀၁၆ ချန်ပီယံဟာ ဆလိုဗေးနီးယားကို မိနစ် ၁၂၀ လုံးလုံး ဂိုးမသွင်းနိုင်ခဲ့တာကြောင့် ပင်နယ်တီ အဆုံးအဖြတ် ခံယူခဲ့ရတာ ဖြစ်ပြီး ဟီးရိုးဖြစ်ခဲ့တဲ့ ဂိုးသမား ကော်စတာကြောင့် နောက်တဆင့် တက်ခဲ့တာပါ။
ရော်နယ်ဒိုဟာ အချိန်ပိုမှာ ပင်နယ်တီ လွဲချော်ခဲ့ပေမယ့်လည်း ပင်နယ်တီအဆုံးအဖြတ် မှာတော့ ဂိုးဝင်အောင် ကန်သွင်းနိုင်ခဲ့ပြီး အချိန်ပိုမှာ ဆက်စကိုရဲ့ ကန်ချက်ကို အကောင်းဆုံး ကာကွယ်ပေးခဲ့တဲ့ ဂိုးသမား ကော်စတာကလည်း ပင်နယ်တီ အဆုံးအဖြတ်မှာ ၃ လုံးထိ ပုတ်ထုတ် ကာကွယ်ပေးခဲ့ပါတယ်။
ပွဲအပြီးမှာ မာတီနက်ဇ်က “ရော်နယ်ဒိုဟာ ပင်နယ်တီ လွဲချော်ခဲ့ပေမယ့်လည်း ပင်နယ်တီ shoot-out ကို အကောင်းဆုံး စတင်ပေးခဲ့ကာ လမ်းကြောင်းမှန်ပေါ် ရောက်စေခဲ့ပါတယ်။ ဒါဟာ ညီညွှတ်မှုရဲ့ အောင်ပွဲပါ။ အဝတ်လဲခန်းမှာကော ကွင်းထဲမှာပါ ခရစ်စတီယာနိုဟာ အသင်းခေါင်းဆောင်ပါ။ သူဟာ ဒါကို ဘဝမှာကော ဘောလုံးမှာပါ ပြသခဲ့ပါတယ်။ ခက်ခဲတဲ့ ကာလတွေ ရှိခဲ့ပေမယ့်လည်း ကျနော်တို့ကတော့ အရှုံးမပေးပါဘူး။ ကျနော်တို့ ဆက်သွားရမှာပါ။ အဆင်မပြေမှုတွေ ရှိတဲ့အခါမှာ ဘာလုပ်ရမလဲဆိုတာကို ဒီဟာက ပြသပေးခဲ့ပါတယ်။
ကျနော်တို့ တအား ကြိုးစားခဲ့ပါတယ်။ စွမ်းအင် အင်အား စိတ်ဓာတ်တွေ ပေါင်းစပ်ပြီးနောက် ဒီလိုပုံစံမျိုး နိုင်ခဲ့တာ ကတော့ အရမ်းကို ကောင်းခဲ့ပါတယ်။”
ဂိုးသမား ကော်စတာနဲ့ ပက်သက်ပြီး မာတီနက်ဇ်က “ပေါ်တူဂီရဲ့ လျို့ဝှက်လက်နက်က ကော်စတာပါ။ သူဟာ ဥရောပ ဘောလုံးလောကရဲ့ လက်နက်ပုန်း ဖြစ်ပါတယ်။ ဒီနေ့မှာ သူဟာ ခြားနားတဲ့ level နဲ့ စွမ်းဆောင်ပြခဲ့ပါတယ်။ သူဟာ ဆက်စကိုနဲ့ one v one မှာ အကောင်းဆုံး လုပ်ပြခဲ့ပါတယ်။
အဲဒီနောက် သူဟာ အပြည့်အ၀ အာရုံစိုက်မှုနဲ့ ပင်နယ်တီ အဆုံးအဖြတ်မှာ ၃ ကြိမ်ဆက် ကာကွယ်ခဲ့ပါတယ်။ ကျနော်တို့ သူနဲ့ ပက်သက်ပြီး တအားကို ဂုဏ်ယူမိပါတယ်။
