ဒီနေ့ နံနက် မြန်မာစံတော်ချိန် အစောပိုင်းမှာ ယူရို ၂၀၂၀ အုပ်စု ပွဲစဉ် အဖြစ် ဘယ်ဂျီယံ နဲ့ ရုရှား တို့ ယှဉ်ပြိုင် ကစားခဲ့ကြပြီး ဘယ်ဂျီယံ အသင်းက သုံးဂိုး ဂိုးမရှိ နဲ့ ဂိုးပြတ် အနိုင် ရခဲ့ပါတယ် ။ ဘယ်ဂျီယံ အတွက် ဂိုးတွေကိုတော့ လူကာကူ က နှစ်ဂိုး ၊ မူနဲယား က တစ်ဂိုး သွင်းယူ ပေးခဲ့တာပါ ။
ဘယ်ဂျီယံ နဲ့ ရုရှား ပွဲမတိုင်ခင် ကစားခဲ့တဲ့ ဒိန်းမတ် နဲ့ ဖင်လန် ပွဲက အဲရစ်ဆင် ရုတ်တရက် ကွင်းထဲ လဲကျမှုဟာ တစ်ကမ္ဘာလုံးက ဘောလုံး ပရိသတ်တွေကို အံ့ဩ တုန်လှုပ်စေခဲ့ပါတယ် ။ အဲရစ်ဆင်ဟာ ပထမပိုင်းပြီးခါနီးမှာ ကွင်းထဲ လဲကျ သွားခဲ့ပြီး ငါးမိနစ်ခန့် နှလုံးခုန် ရပ်တန့် သွားခဲ့တာပါ ။
အဲရစ်ဆင် လဲကျ သွားချိန်မှာ ဒိန်းမတ် အသင်း ခေါင်းဆောင် ခါဂျာ ဟာ ကိုယ့်လျှာကိုယ် ပြန်မမြိုမိသွားအောင် လုပ်ဆောင် ပေးခဲ့ပြီး ဒိုင်လူကြီး အန်တိုနီတေလာ ကလည်း ပွဲကို ချက်ချင်း ရပ်တန့် ၊ ဆေးအဖွဲ့ကို အလျင်အမြန် ခေါ်ဆောင် ခဲ့ပါတယ် ။
ဆေးအဖွဲ့ဟာ အဲရစ်ဆင် သတိပြန်လည်လာအောင် လုပ်ဆောင်ပေးခဲ့ပြီး ဆေးရုံသို့ အလျင်အမြန် ပို့ဆောင် ပေးခဲ့တာကြောင့် အဲရစ်ဆင် တစ်ယောက် အသက် အန္တရယ် စိုးရိမ်ရတဲ့ အခြေအနေ ကနေ လွတ်မြောက် သွားခဲ့ပါတယ် ။ အဲရစ်ဆင် ဟာ အခုအချိန်မှာ ပြန်လည် သက်သာလာပြီ ဖြစ်ပြီး လိုအပ်တဲ့ စမ်းသပ် စစ်ဆေးမှုတွေတော့ လုပ်ရဦးမှာပါ ။
အဲရစ်ဆင် တစ်ယောက် လဲကျသွားချိန်မှာ ကမ္ဘာတစ်ဝန်းက အားကစားသမားတွေ ၊ ပရိသတ်တွေ နဲ့ ကျော်ကြားသူတွေဟာ ဒိန်းမတ်သား အမြန်ဆုံး ပြန်လည် သက်သာလာစေဖို့ ဆုတောင်း ပေးခဲ့ကြပါတယ် ။ ဒါ့အပြင် အဲရစ်ဆင် ရဲ့ ကလပ်အသင်းဖော်တွေ ဖြစ်တဲ့ လူကာကူ နဲ့ ဟာခီမီ တို့ဟာလည်း ဂိုးသွင်းအပြီးမှာ အဲရစ်ဆင် ကို ရည်ညွှန်း အောင်ပွဲ ခံခဲ့ကြပါတယ် ။
ရုရှား နဲ့ ပွဲမှာ သွင်းဂိုး နှစ်ဂိုး သွင်းပြီး အကောင်းဆုံးဆု ရခဲ့တဲ့ လူကာကူ က beIN Sports နဲ့ အင်တာဗျူးမှာ ” အသင်း နိုင်ပွဲ ရတဲ့ အတွက် ကျနော် ပျော်ရွှင်မိပါတယ် ၊ ဒါပေမယ့်ဗျာ ကျနော့်စိတ်ထဲမှာ အသင်းဖော် အဲရစ်ဆင် အကြောင်းပဲ တွေးနေမိတာကြောင့် ကစားရ အတော် ခက်ခဲ့ပါတယ် ။ ”
” သူ ကျန်းမာဖို့ မျှော်လင့်ပါတယ် ၊ ဒီနေ့ စွမ်းဆောင်ရည်က သူ့အတွက်ပါပဲ ၊ သူ့အတွက် ကစားခဲ့တာပါ ။ ကျနော် အဲရစ်ဆင် ရဲ့ ဖြစ်ရပ်ကို မြင်ပြီး မျက်ရည်တွေ အများကြီး ကျခဲ့ရပါတယ် ၊ ကျနော် အတော်လေးလည်း လန့်သွားခဲ့တာပါ ။ ”
” ကျွန်တော်တို့က တစ်နှစ်ခွဲကျော်လောက် အခိုက်အတန့်ကောင်းတွေကို အတူတူ ဖြတ်သန်းလာသူတွေလေ ၊ မိသားစုထက်တောင် သူနဲ့ အချိန်ပိုကုန်ဆုံး ဖြစ်ပါတယ် ၊ ကျွန်တော့်ရဲ့ ခံစားချက်တွေက သူ ၊ သူရဲ့ ချစ်သူ ၊ သူ့ရဲ့ ကလေး နှစ်ယောက် ၊ မိသားစု နဲ့ ထပ်တူပါပဲ ။ ” လို့ ပြောကြား သွားခဲ့ပါတယ် ။
