ရီးယဲလ်တိုက်စစ်ကစားသမား ဗင်နီစီယပ်စ်သည် အသင်း၏ စာချုပ်သစ်အတွက် ကမ်းလှမ်းမှုအပေါ် မပျော်မရွှင်ဖြစ်နေပြီး အသင်းမှ ၎င်းထွက်ခွာသွားမည်ကို အသင်းဥက္ကဋ္ဌ ပီရက်ဇ်နှင့် နည်းပြ အန်ဆယ်လော့တီတို့က စိုးရိမ်နေကြကြောင်း သိရှိရသည်။
ရီးယဲလ်အသင်းနှင့် ချုပ်ဆိုထားသည့် ဘရာဇီးလ်လက်ရွေးစင်တိုက်စစ်ကစားသမား ဗင်နီစီယပ်စ်၏ လက်ရှိစာချုပ်မှာ ၂၀၂၄ ခုနှစ်၊ ဇွန် (၃၀) ရက်တွင် ကုန်ဆုံးမည်ဖြစ်သည်။
အသက် (၂၂) နှစ်အရွယ်ရှိ ဗင်နီစီယပ်စ်သည် ပြီးခဲ့သည့် ၂၀၂၁-၂၂ ရာသီ ချန်ပီယံလိဂ်ဗိုလ်လုပွဲတွင် လီဗာပူးလ်အသင်းဘက်သို့ တစ်လုံးတည်းသော အနိုင်ဂိုးကို သွင်းယူပေးခဲ့သူဖြစ်သည်။
ရီးယဲလ်အသင်းသည် ချန်ပီယံလိဂ်ဖလားရယူပြီးနောက် လပိုင်းအကြာကတည်းက ဗင်နီစီယပ်စ်အား နောက်ထပ် (၃)နှစ်သက်တမ်းတိုး စာချုပ်ချုပ်ဆိုရန် ကြိုးပမ်းနေခဲ့ကြောင်း သိရှိရသည်။
ရီးယဲလ်အသင်းသည် ဗင်နီစီယပ်စ်ကို အသင်းတွင် ၂၀၂၇ ခုနှစ်အထိ ရှိနေမည့် စာချုပ်သစ်တစ်ရပ် ချုပ်ဆိုလိုနေပြီး ယင်းအတွက် ကစားသမားဖြစ်သူထံ ကမ်းလှမ်းခဲ့ကြောင်း သိရသည်။
သို့သော် စပိန်မီဒီယာများ၏ ဖော်ပြမှုအရ ဗင်နီစီယပ်စ်သည် ရီးယဲလ်အသင်းကမ်းလှမ်းသည့် လစာနှုန်းထားအပေါ် မပျော်မရွှင်ဖြစ်နေကြောင်း သိရှိရသည်။
ဗင်နီစီယပ်စ်သည် ၎င်း၏လက်ရှိခြေစွမ်းအရ ရီးယဲလ်အသင်း၏ လစာအများဆုံးရရှိသူများထဲတွင် ပါဝင်သင့်သည်ဟု ထင်မြင်ယူဆနေကြောင်း သိရှိရသည်။
ဗင်နီစီယပ်စ်သည် ယခုရာသီတွင် ရီးယဲလ်အသင်းအတွက် ပြိုင်ပွဲစုံ (၂၅)ပွဲတွင် (၁၀)ဂိုးသွင်းယူထားပြီး ဂိုးဖန်တီးမှု (၅) ကြိမ် ပြုလုပ်ထားသည်။ သို့သော် ဗင်နီစီယပ်စ်သည် ရီးယဲလ်အသင်းအတွက် ပြိုင်ပွဲစုံနောက်ဆုံး (၆)ပွဲတွင် ဂိုးသွင်းယူ နိုင်ခြင်းမရှိသလို၊ ဂိုးဖန်တီးမှုလည်း ပြုလုပ်ပေးနိုင်ခဲ့ခြင်း မရှိပေ။
ဗင်နီစီယပ်စ်အနေဖြင့် ယင်းသို့ခြေစွမ်းကျဆင်းနေခြင်းမှာ အသင်း၏စာချုပ်သစ်ကိစ္စလည်း ပါဝင်နိုင်ကြောင်း သုံးသပ်မှုများရှိနေသည်။ ရီးယဲလ်အသင်းသည် ဗင်နီစီယပ်စ်အား စာချုပ်သက်တမ်းတိုးရန် ကြိုးပမ်းနေဆဲဖြစ်ပြီး အသင်း ဥက္ကဋ္ဌ ပီရက်ဇ်နှင့် နည်းပြ အန်ဆယ်လော့တီသည် စာချုပ်သစ်ထပ်မံအဆင်မပြေဖြစ်ပြီး အသင်းမှ ဗင်နီစီယပ်စ်ထွက်ခွာသွားမည်ကို စိတ်ပူနေကြကြောင်း သိရှိရသည်။