ရိုးမားအသင်း၏ နယ်သာလန်လက်ရွေးစင်ကွင်းလယ်လူ ၀ိုင်နယ်လ်ဒမ်းသည် ခြေထောက်ကျိုး ဒဏ်ရာရရှိခဲ့သောကြောင့် ကာတာကမ္ဘာ့ဖလားပြိုင်ပွဲကို လွဲချော်ဖွယ်ရှိနေကြောင်း သိရသည်။
၀ိုင်နယ်လ်ဒမ်း (၃၁ နှစ်) သည် သြဂုတ်လဆန်းတွင် PSG အသင်းမှ ရိုးမားအသင်းသို့ တစ်ရာသီအငှားစာချုပ်ဖြင့် ပြောင်းရွှေ့လာသူဖြစ်သည်။ ၎င်းသည် ပြီးခဲ့သည့်တနင်္ဂနွေနေ့က လေ့ကျင့်မှု ပြုလုပ်စဉ် ယာဘက်ခြေထောက် ခြေသလုံးရိုးကျိုးဒဏ်ရာ ရရှိခဲ့ခြင်းဖြစ်သည်။
၎င်းအနားယူရမည့်ကာလကို ရိုးမားအသင်းက ထုတ်ပြန်ခြင်းမရှိသေးသော်လည်း လအနည်းငယ်ကြာ အနားယူရဖွယ်ရှိရာ နိုဝင်ဘာတွင် ကျင်းပမည့် ၂၀၂၂ ကမ္ဘာ့ဖလားပြိုင်ပွဲကို လွဲချော်ဖွယ်ရှိနေကြောင်း မီဒီယာများက ခန့်မှန်းဖော်ပြလျက်ရှိသည်။
၀ိုင်နယ်လ်ဒမ်းသည် PSG အသင်းတွင် ပုံမှန်နေရာမရရှိသောကြောင့် ကမ္ဘာ့ဖလားအခွင့်အရေးရရှိရန်အတွက် ရိုးမားအသင်းထံ အငှားဖြင့် ပြောင်းရွှေ့လာခဲ့ခြင်းဖြစ်သည်။ သို့သော် ယခုအခါ ဒဏ်ရာပြဿနာကြောင့် ကမ္ဘာ့ဖလားပြိုင်ပွဲနှင့် လွဲချော်ရမည့်အနေအထား ဖြစ်လာခဲ့ခြင်းအတွက် ပရိသတ်အချို့က လှောင်ပြောင်ခဲ့ကြောင်းလည်း သိရသည်။
