ဘိုရုရှား ဒေါ့မွန် အသင်းရဲ့ CEO ဖြစ်သူ ဟန်းစ် ဂျိုအာချင် ဝက်ဇ်ကီးဟာ မန်ချက်စတာ ယူနိုက်တက် အသင်းနဲ့ သတင်းတွေ ကျယ်လောင် နေခဲ့စဥ် အသင်းရဲ့ တောင်ပံ တိုက်စစ် ကစားသမားဖြစ်သူ ဂျေဒန်ဆန်ချိုရဲ့ အပြုအမူ တွေဟာ ပရိုဆန်ခဲ့ကြောင်း ချီးကျူး သွားခဲ့လိုက်ပါတယ် ။
မန်ချက်စတာ ယူနိုက်တက် အသင်းဟာ ဂျေဒန် ဆန်ချိုကို ခေါ်ယူဖို့ စိတ်ဝင်စားနေခဲ့တာ နှစ်တွေ အတော်လေး ကြာခဲ့ပြီး အဆိုပါ ကာလအတွင်း ကမ်းလှမ်းမှုတွေလည်း အကြိမ်ကြိမ် လုပ်ဆောင်ထားဖြစ်ခဲ့ ပါတယ် ။ ဒါပေမယ့် အပြောင်းအရွှေ့ဟာ လက်တွေ့မှာတော့ မဖြစ်ခဲ့ပါဘူး ။
ဒါပေမဲ့ မနေ့ကတော့ ဒေါ့မွန် အသင်းဖက်မှ အကြီးအကဲ ဖြစ်သူ ဟန့်စ် ဂျိုအာချင် ဝက်ဇ်ကီး က ဆန်ချိုကို ယူနိုက်တက် အသင်းဆီ ပေါင် 72.9 သန်းနဲ့ ရောင်းချဖို့ သဘော တူညီမှု ရရှိခဲ့ပြီ ဖြစ်ကြောင်း အတည်ပြုပေးခဲ့သလို ယူနိုက်တက် အသင်းဖက်ကလည်း ဆန်ချိုအတွက် သဘော တူညီမှု ရခဲ့ပြီလို့ အတည်ပြုပေးခဲ့ ပါတယ် ။
ဒါ့ကြောင့် စာချုပ်ပါ အချက်အလက် ဆိုင်ရာ ဆွေးနွေးမှု ၊ ဆေးစစ်မှုတွေ ပြီးရင်တော့ ဆန်ချိုဟာ မန်ချက်စတာ ယူနိုက်တက် အသင်းရဲ့ တရားဝင် ကစားသမား ဖြစ်လာနိုင်ပါ လိမ့်မယ် ။ အခုတော့ ဆန်ချိုရဲ့ အပြောင်းအရွှေ့ ပုံပြင် ဇာတ်လမ်း အရှည်ကြီးဟာ ကုန်ဆုံးသွားခဲ့ရ ပါပြီ ။
အပြောင်းအရွှေ့သတင်းတွေ ကျယ်လောင်ခဲ့တဲ့ အချိန် ကာလ ဆိုတာ ကစားသမားတွေ အတွက် စိတ် ကစဥ့်ကလျား ဖြစ်စေတဲ့ အခိုက်အတန့် ပဲ ဖြစ်ပါတယ် ။ ဒါပေမဲ့ အဆိုပါ ကာလအတွင်းမှာ ဆန်ချိုဟာ ပရော်ဖက်ရှင်နယ် ဆန်ဆန် နေထိုင်ခဲ့ကြောင်း ဒေါ့မွန်အကြီးအကဲ ဝက်ဇ်ကီး က ထုတ်ဖော် ပြောကြား သွားခဲ့လိုက် ပါတယ် ။
” ကစားသမား တစ်ဦးဟာ ကိုယ့်ရဲ့ အသင်းမှာ ငယ်စဥ် ကတည်းက ရှိနေမယ် ၊ လေးနှစ်လောက် ကစားပေးမယ်၊ အရာရာ ပေးဆပ်ကစားပေးရင်းနဲ့ အသင်းပြောင်းရွှေ့ချင်တယ် (ဒါ့မှမဟုတ်) ထွက်ခွာချင်ပြီ ဆိုတဲ့ စကားမျိုး ပြောတာက ကျွန်တော်တို့ အတွက် ခြားနားလှ ပါတယ် ”
” ဒါပေမဲ့ ဂျေဒန်ရဲ့ ပြုမူ ဆက်ဆံခဲ့ပုံတွေက လှပလွန်းခဲ့ ပါတယ် ။ သူဟာ ဘောလုံး ရာသီရဲ့ ဒုတိယ ရာသီဝက်မှာ ပရော်ဖက်ရှင်နယ်ဆန်စွာ အကောင်းဆုံး ကြိုးစား ကစားပေးခဲ့ပြီး အသင်းကို ရှေ့ရောက်နိုင်အောင် ကူညီပေးရင်း အခုတော့ ဒီလို အနေအထားမျိုးကို ( အသင်း ပြောင်းရွှေ့ခွင့် ) ပိုင်ဆိုင်ခဲ့ပါပြီ ”
” ကျွန်တော်တို့ဟာ သူ့ကို ရောင်းလို့ ပိုက်ဆံရတော့မယ် ဆိုပြီး ပျော်ရွှင်မနေကြပါဘူး ။ သူ့လို ကစားသမားမျိုးကို ဆုံးရှုံးရတော့မယ်ဆိုတဲ့ အတွေးနဲ့ ဝမ်းနည်းတာ ပိုများနေပါတယ် ” လို့ ဝက်ဇ်ကီး က ပြောကြားရင်း အဆိုပါ နေရာကို ကစားသမားသစ် ခေါ်ယူ အစားထိုးရေးနဲ့ ပတ်သက်လို့…
” ဂျေဒန်ရဲ့ အရည်အသွေးတွေကို ခန့်မှန်းရ ခက်ခဲလှပါတယ် ။ နည်းပြတိုင်း အသင်းမှာ ဂျေဒန်လို ကစားသမားမျိုး လိုချင်ကြမှာတော့ အသေအချာပါပဲ ။ အရင်ထဲက အချိန် တခုရောက်ရင် ဂျေဒန်ဟာ အသင်းမှာ ဆက်လက် ရှိမှာ မဟုတ်ဘူး ဆိုတဲ့ အကြောင်းကို ကျွန်တော်တို့ သိရှိ နေခဲ့ကြ ပါတယ် ”
” အခုတော့ အပြောင်းအရွှေ့ဟာ ဖြစ်ပွားပါတော့မယ် ။ ကျွန်တော်တို့ ဒါတွေကို ကိုင်တွယ် ဖြေရှင်းရင်းနဲ့ ဒီနေရာမှာ အင်အား ပြန်လည် ဖြည့်တင်းရပါ့မယ် ။ ကျွန်တော်တို့ ဂျေဒန်လို ကစားသမားမျိုး ရနိုင်မှာတော့ မဟုတ်ပါဘူး ။ ဒါပေမဲ့ ဖန်တီးမှု အားကောင်းတဲ့ တစ်စုံတစ်ယောက်ကို ကြိုးစား ရှာဖွေသွားကြမှာပါ ”
” လက်ရှိ အနေအထားတွေက အချို့နေရာတွေမှာ ကျွန်တော့်တို့ အင်အား ဖြည့်တင်းမှု တွေကို ပြန်လည် လုပ်ရမယ်ဆိုတာကို သိသာ ထင်ရှားစေတဲ့ အခိုက်အတန့်တွေ ပါပဲ ။ ကျွန်တော်တို့ အသင်းကို တောင့်တင်းစေအောင် လုပ်ဆောင်သွားကြမှာပါ ” လို့ ဝက်ဇ်ကီး က ဖြေကြား သွားခဲ့ပါတယ် ။
