လီဗာပူးလ်လက်ထောက်နည်းပြ ပတ်လင်ဒါက ယခုဇန်နဝါရီအပြောင်းအရွှေ့ကာလတွင် ကစားသမားသစ် ခေါ်ယူဖွယ်မရှိကြောင်း ပြောကြားခဲ့သည်။
ပရီးမီးယားလိဂ်အမှတ်ပေးဇယားထိပ်ဆုံးတွင် ဦးဆောင်နေသည့် လီဗာပူးလ်အသင်းသည် လက်ရှိတွင် ဆာလာနှင့် အန်ဒိုတို့ကို နိုင်ငံအသင်းများအတွက် စေလွှတ်ထားရသလို၊ ဒဏ်ရာရကစားသမားများပြားနေသည့်အတွက် ယခုဇန်နဝါရီတွင် ကစားသမားသစ်များ ခေါ်ယူဖွယ်ရှိသည်ဟု သတင်း များထွက်ပေါ် ခဲ့သည်။
သို့သော် လီဗာပူးလ်လက်ထောက်နည်းပြ ပတ်လင်ဒါက ပြီးခဲ့သည့်နွေရာသီတွင် ငွေကြေးများစွာ အသုံးပြုခဲ့ခြင်းကြောင့် ယခုဇန်နဝါရီတွင် ကစားသမားသစ် ခေါ်ယူရန်ထက် အသင်းအကယ်ဒမီမှ လူငယ်ကစားသမားများကိုသာ အသုံးပြုသွားမည်ဖြစ်ကြောင်း ပြောကြားခဲ့ခြင်းဖြစ် သည်။
ပတ်လင်ဒါက “ကျွန်တော်တို့ နွေတုန်းက ငွေကြေးများစွာ သုံးခဲ့ပါတယ်။ ပိုင်ရှင်တွေက အသင်းအတွက်လိုအပ်တဲ့ ကစားသမားတွေကို ခေါ်ပေးခဲ့တယ်။ အခုအချိန်မှာ ဒဏ်ရာရကစားသမားတွေ များနေပေမဲ့ သူတို့ အချိန်မီပြန်လာနိုင်မယ်လို့ ထင်ပါတယ်။ ပြီးတော့ အသင်းရဲ့အကယ်ဒမီအပေါ် မှာလည်း ယုံကြည်မှုရှိပါတယ်။ အကယ်ဒမီကစားသမားတွေနဲ့ ဆုဖလားရဖို့ ကြိုးစားရမှာပါ”ဟု ပြောကြားခဲ့သည်။
လီဗာပူးလ်အသင်းသည် ပြီးခဲ့သည့် နွေက ဆိုဘိုဆလိုင်း၊ အယ်လစ္စတာ၊ အန်ဒိုနှင့် ဂရာဗန်ဘာ့ချ်တို့ကို ပေါင် (၁၄၅)သန်း အသုံးပြုကာ ခေါ်ယူခဲ့ခြင်းဖြစ်သည်။
