မန်စီးတီးအသင်းနောက်ခံလူ မန်ဒီသည် မုဒိမ်းမှုကျူးလွန်ခံရကြောင်း စွပ်စွဲသူအား ၎င်းမှာ အမျိုးသမီး ၁၀ç၀၀၀ နှင့် အတူအိပ်ဖူးကြောင်း ပြောကြားခဲ့သည်ဟု အစိုးရရှေ့နေဖြစ်သူက တရားရုံးသို့ ထွက်ဆိုခဲ့သည်။
ယခုရာသီကုန်တွင် မန်စီးတီးအသင်းနှင့် စာချုပ်ကုန်ဆုံးသွားပြီဖြစ်သည့် မန်ဒီ (၂၈ နှစ်) သည် ၂၀၂၁ ခုနှစ် သြဂုတ်ကတည်းက မုဒိမ်းမှု၊ လိင်ပိုင်းဆိုင်ရာကျူးလွန်မှုများကြောင့် ဖမ်းဆီးခံရပြီး ဘောလုံးကစားခွင့်မရဘဲ တရားရင်ဆိုင်နေရသူဖြစ်သည်။
၎င်းသည် အမျိုးသမီးလေးဦးကို မုဒိမ်းမှုစွဲချက်ခြောက်ခု၊ လိင်ပိုင်းဆိုင်ရာကျူးလွန်မှု စွဲချက်တစ်ခုအတွက် အပြစ်မရှိကြောင်း ဇန်နဝါရီတွင် ဆုံးဖြတ်ခံရသော်လည်း အသက် ၂၄ နှစ်အရွယ် အမျိုးသမီးကို လိင်ပိုင်းဆိုင်ရာကျူးလွန်မှု၊ အသက် ၂၉ နှစ်အရွယ် အမျိုးသမီးကို အဓမ္မပြုကျင့်မှု စသည့်စွဲချက်နှစ်ခုအတွက် ဆက်လက်စစ်ဆေးခံနေရဆဲဖြစ်သည်။
ကြာသပတေးနေ့က ချက်စတာခရောင်း တရားရုံး၌ ပြုလုပ်သည့် ကြားနာစစ်ဆေးမှုတွင် အစိုးရရှေ့နေဖြစ်သူ ဘင်ဂျမင်အင်နာက မန်ဒီသည် နေအိမ်အနီးရှိ ဘားတစ်ခု၌ တွေ့ဆုံခဲ့သည့် အမျိုးသမီးနှင့် မိတ်ဆွေများကို နေအိမ်သို့ဖိတ်ခေါ်ခဲ့ကြောင်း၊ အိမ်သို့ရောက်ရှိစဉ် မန်ဒီက စွပ်စွဲသူ၏ဖုန်းကိုယူ၍ အိပ်ခန်းအတွင်း ခေါ်ဆောင်သွားကြောင်း၊ ဖုန်းပြန်တောင်းရာ မန်ဒီက အဝတ်အစားများကိုချွတ်ခိုင်းခဲ့ကြောင်း၊ အဝတ်များချွတ်ပြီးနောက် စွပ်စွဲသူက ငြင်းဆန်သော်လည်း နောက်မှနေ၍ အဓမ္မပြုကျင့်ခဲ့ကြောင်း၊ ယင်းကဲ့သို့ ကျူးလွန်စဉ် မန်ဒီက ၎င်းမှာ အမျိုးသမီး ၁၀၀၀၀ နှင့် အတူအိပ်ဖူးသည်ဟု ပြောကြားခဲ့ကြောင်း တရားရုံးသို့ ထွက်ဆိုခဲ့ခြင်းဖြစ်သည်။
