လီဗာပူးလ်အသင်းသည် အသင်းတိုက်စစ်ကစားသမား မာနေအတွက် ဘိုင်ယန်မြူးနစ်အသင်းမှ ပြောင်းရွှေ့ကြေး ပေါင်သန်း ၃၀ ဖြင့် ဒုတိယအကြိမ်ကမ်းလှမ်းမှုကို ငြင်းဆန်ခဲ့ကြောင်း သိရသည်။
ဘိုင်ယန်မြူးနစ်အသင်းသည် ဇွန်လ ၆ ရက်က မာနေကိုခေါ်ယူရန် ပြောင်းရွှေ့ကြေး ပေါင် ၂၅ သန်းဖြင့် စတင်ကမ်းလှမ်းခဲ့သော်လည်း ပယ်ချခံရပြီးနောက် နှစ်ရက်အကြာတွင် ပေါင် သန်း ၃၀ ဖြင့် ထပ်မံကမ်းလှမ်းမှုမှာလည်း ငြင်းဆန်ခြင်းခံခဲ့ရသည်။
လီဗာပူးလ်အသင်းသည် အသက် ၃၀ နှစ်အရွယ်ရှိ မာနေ၏ပြောင်းရွှေ့ကြေး ယူရိုသန်း ၅၀ (ပေါင် ၄၂.၈ သန်း)အထိ အလိုရှိနေကြောင်း သိရသည်။ မာနေသည် ၂၀၁၆ ခုနှစ်တွင် ဆောက်သမ်တန်အသင်းမှ ပြောင်းရွှေ့ကြေး ပေါင် ၃၆ သန်းဖြင့် ရောက်ရှိလာပြီး အသင်းအတွက် ပြိုင်ပွဲစုံ ဂိုး ၁၂၀ သွင်းယူကာ ၂၀၁၉ ခုနှစ်တွင် ချန်ပီယံလိဂ်ဖလား၊ ၂၀၂၀ ခုနှစ်တွင် ပရီးမီးယားလိဂ်ဖလား ဆွတ်ခူးခဲ့ရာ၌ အဓိကအခန်းကဏ္ဍမှ ပါဝင်ခဲ့သည်။
၂၀၁၈ ခုနှစ်တွင် အသင်းနှင့် စာချုပ်သက်တမ်းတိုးခဲ့သည့် မာနေ၏လက်ရှိစာချုပ်မှာ လာမည့်ရာသီအပြီးတွင် သက်တမ်းကုန်ဆုံးမည်ဖြစ်ကြောင်း သိရသည်။
လီဗာပူးလ်အသင်းသည် တိုက်စစ်ပိုင်းအားဖြည့်ရန်အတွက် ဘင်ဖီကာအသင်းမှ ဥရုဂွေးလူငယ်တိုက်စစ်မှူး ဒါဝင်နူနက်ဇ်အားခေါ်ယူရန် ပစ်မှတ်ထားလျက်ရှိသည်။
လီဗာပူးလ်အနေဖြင့် ဒါဝင်နူနက်ဇ်အား ပြောင်းရွှေ့ကြေး ယူရို သန်း ၈၀ အထိ အသုံးပြုပြီး ခေါ်ယူသွားရန် ပြင်ဆင်နေလျက် ရှိသည်။
