စပါးအသင်းနည်းပြ နူနိုသည် မန်ယူအသင်းအား အိမ်ကွင်း၌ ရှုံးနိမ့်ပြီးနောက် ထုတ်ပယ်ခံရနိုင်သည့်နည်းပြစာရင်းတွင် ထိပ်ဆုံးရောက်ရှိ လာကြောင်း သိရသည်။
ယင်းပွဲမတိုင်မီ နှစ်သင်းစလုံး ရလဒ်ဆိုးများကြောင့် ရုန်းကန်နေရသဖြင့် နည်းပြနှစ်ဦးစလုံး ဖိအားများ ရင်ဆိုင်နေရသော်လည်း အဝေးကွင်း ဂိုးပြတ်အနိုင်ရခဲ့သည့် ဆိုးလ်ရှားမှာ ဖိအားအနည်းငယ်လျော့ကျသွားပြီ ဖြစ်သည်။
ထို့ပြင် ပရီးမီးယားလိဂ်မှ ထုတ်ပယ်ခံရနိုင်သည့် နည်းပြစာရင်းတွင် ထိပ်ဆုံးနေရာရပ်တည်နေသည့် ဆိုးလ်ရှားကိုကျော်၍ နူနိုက ရေပန်းအစားဆုံးဖြစ်လာကြောင်း သိရသည်။
စပါးအသင်းသည် ယခုရာသီ ပွဲစဉ် ၁၀ အပြီးတွင် ငါးပွဲနိုင်၊ ငါးပွဲရှုံး ဖြင့် ၁၅ မှတ်သာ ရရှိထားသလို ယူရိုပါကွန်ဖရင့်လိဂ်တွင်လည်း သုံးပွဲကစား၊ တစ်ပွဲနိုင်၊ တစ်ပွဲသရေ၊ တစ်ပွဲရှုံးဖြင့် အုပ်စုတွင်းတတိယနေရာ ရပ်တည်နေသည်။
သို့ဖြစ်ရာ နူနို အနေဖြင့် ထုတ်ပယ်ခံရနိုင်သည့်စာရင်းတွင် အလေးပေးမှု ၆း၄ ဖြင့် ဆိုးလ်ရှားကိုကျော်၍ ထိပ်ဆုံးနေရာ ရောက်ရှိလာခြင်းဖြစ်သည်။
ပေါ်တူဂီနည်းပြဖြစ်သူ နူနို (၄၇ နှစ်) သည် ယခုရာသီမှသာ စပါးအသင်းနည်းပြအဖြစ် နှစ်နှစ်စာချုပ်ဖြင့် ခန့်အပ်ခံထားရသူဖြစ်သည်။
နူနို၏နောက်တွင် ဆိုးလ်ရှားက ၁၃း၈ ဖြင့် ဒုတိယ၊ နောဝစ်ချ်အသင်းနည်းပြ ဒန်နီယဲလ်ဖာကယ်က ၃း၁ ဖြင့် တတိယ၊ ဗီလာအသင်းနည်းပြ ဒင်းန်စမစ်က ၁၄း၁ ဖြင့် စတုတ္ထ၊ ဝက်ဖို့ဒ်အသင်းနည်းပြ ရာနီရေးရီက ၁၆း၁ ဖြင့် ပဥ္စမနေရာတွင် အစဉ်လိုက်ရပ်တည် နေသည်။
