မန်ယူအသင်း လူငယ်ကြယ်ပွင့်ကစားသမား အယ်လန်ဂါသည် အသင်းသမိုင်းတစ်လျှောက် ချန်ပီယံလိဂ်ပြိုင်ပွဲ ရှုံးထွက်အဆင့်တွင် ဂိုးသွင်းယူနိုင်သည့် အသက်အငယ်ဆုံးကစားသမားအဖြစ် မှတ်တမ်းဝင်ခဲ့ကြောင်း သိရသည်။
အသက် ၁၉ နှစ် ၃၀၂ ရက်သာရှိသေးသည့် ဆွီဒင်တောင်ပံကစားသမား အယ်လန်ဂါသည် ဗုဒ္ဓဟူးနေ့က အက်သလက်တီကိုအသင်းနှင့် တစ်ဂိုးစီသရေကျသည့် ချန်ပီယံလိဂ်ပွဲတွင် အရေးပါသည့်ချေပဂိုး သွင်းယူပေးနိုင်ခဲ့သည်။
အယ်လန်ဂါသည် ဒုတိယပိုင်း ၇၅ မိနစ်တွင် ရပ်ရှ်ဖို့ဒ်နေရာ အစားထိုးဝင်ရောက်ကစားခဲ့ပြီး မိနစ် ၈၀ တွင် ပထမဆုံးထိချက်မှတစ်ဆင့် ဂိုးသွင်းယူနိုင်ခဲ့ခြင်းဖြစ်သည်။
“ကျွန်တော့်ဆီမှာ ဒီလိုအခိုက်အတန့်မျိုးတွေ ရဖို့ အိပ်မက်မက်ထားတာ ရှိပါတယ်။ ချန်ပီယံလိဂ်မှာ အက်သလက်တီကိုမက်ဒရစ်လို ထိပ်တန်းအသင်းကို ဂိုးသွင်းယူနိုင်ဖို့ပါ။ ဒါက အိပ်မက်တစ်ခု တကယ်ဖြစ်လာတာပါ။ အဲဒါက ကျွန်တော့်အတွက် ပထမဆုံး ဘောလုံးထိချက်ဖြစ်မယ်လို့ ထင်တယ်။ သူ (ရန်းနစ်) ကလည်း နောက်ခံလူတွေကို ကြောက်လန့်သွားအောင်လုပ်ဖို့နဲ့ နောက်ကနေပြေးဖို့ ပြောထားပါတယ်။ အခွင့်အရေးရတဲ့အချိန်မှာ အမိအရယူလိုက်တာပါ။ ပရိသတ်တွေအတွက် ရလဒ်ကောင်းယူပေးချင်ပါတယ်။ ဘာဖြစ်လို့လဲဆိုတော့ သူတို့တွေက ခရီးအဝေးကြီးက နေလာခဲ့ရလို့ပါ။ ဒါက အခုမှ ပထမပိုင်းပဲ ရှိပါသေးတယ်။ အိုးလ်ထရက်ဖို့ဒ်မှာကစားရမယ့် ဒုတိယပိုင်းအတွက် ကျွန်တော်တို့ အဆင်သင့်ဖြစ်နေပါပြီ”ဟု အယ်လန်ဂါက ပွဲအပြီးတွင် ပြောကြားသည်။
မန်ယူနှင့် အက်သလက်တီကိုအသင်းတို့၏ ဒုတိယအကျော့ပွဲကို မတ် ၁၅ ရက်တွင် ပြန်လည်ကစားရမည်ဖြစ်သည်။
