မန်ယူအသင်း၏ ပေါ်တူဂီတိုက်စစ်မှူး စီရော်နယ်လ်ဒိုသည် မန်ယူအသင်းတွင် ကစားသမားဘ၀ တတိယအကြိမ်မြောက် ဖလားလက်မဲ့ရာသီကို ကြုံတွေ့ရတော့မည်ဖြစ်ပြီး ယင်းအတွက် ဆုကြေးပေါင်(၅)သန်းဝန်းကျင် နစ်နာဆုံးရှုံးမည်ဟု သိရသည်။
စီရော်နယ်လ်ဒိုသည် ပြီးခဲ့သည့် နွေရာသီအပြောင်းအရွှေ့ကာလတွင် ဂျူဗင်တပ်စ်အသင်းမှ မန်ယူအသင်းသို့ ပြောင်းရွှေ့ခဲ့ခြင်းဖြစ်ပြီး ဂျူဗင်တပ်စ်တွင် ရရှိနေသည့်လစာထက် လျှော့ယူခဲ့ရသည်။
ဂျူဗင်တပ်စ်အသင်းတွင် တစ်ပတ်ပေါင်(၈)သိန်းဝန်းကျင်ရရှိခဲ့ရာမှ မန်ယူအသင်းတွင် တစ်ပတ်ပေါင် (၄)သိန်းခွဲသာ ရရှိကြောင်း သိရသည်။
သို့သော် မန်ယူအသင်းနှင့် ချုပ်ဆိုခဲ့သောစာချုပ်၌ အပိုဆုကြေးရရှိမည့် အချက်အလက်များစွာ ပါဝင်ခဲ့ပြီး ချန်ပီယံလိဂ်ဖလားရယူနိုင်ခဲ့ပါက ပေါင်(၂.၅)သန်း၊ ပရီးမီးယားလိဂ်ဖလားရရှိခဲ့ပါက ပေါင်(၁.၅)သန်း ရရှိမည်ဖြစ်သလို၊ အခြားပြည်တွင်းဖလားများအတွက်လည်း ဆုကြေးများရရှိမည်ဖြစ်သည်။
သို့ရာတွင် လက်ရှိအချိန်၌ ဖလားလက်မဲ့ရာသီကို ကြုံတွေ့ရန် သေချာနေပြီဖြစ်သောကြောင့် ပေါင်(၅)သန်းဝန်းကျင် နစ်နာတော့မည်ဖြစ်သည်။
