မန်ယူနည်းပြ ဆိုးလ်ရှားနှင့် ပေါ့ဘာတို့ အနာဂတ်အတွက် ဆွေးနွေးမှု ပြုလုပ်မည်ဖြစ်ပြီး ဂျူဗင်တပ်စ်သို့ ပြောင်းရွှေ့ဖွယ်ရှိနေ

မန်ယူအသင်း၏ ကွင်းလယ်လူ ပေါ့ဘာသည် သူ၏ အနာဂတ်နှင့်ပတ်သက်၍ အသင်းနည်းပြ ဆိုးလ်ရှားနှင့် တွေ့ဆုံဆွေးနွေးသွားမည်ဖြစ်ပြီး အသင်းမှထွက်ခွာရန် တောင်းဆိုမှုပြုလုပ်ဖွယ်ရှိနေသည်ဟုလည်း သိရှိရသည်။

ပေါ့ဘာသည် မန်ယူအသင်းနှင့် စာချုပ်သက်တမ်း ကုန်ဆုံးရန် နီးစပ်နေပြီဖြစ်ပြီး ၂၀၂၂ ခုနှစ်၊ ဇွန်လတွင် စာချုပ် ပြည့်မည်ဖြစ်သည်။ ယင်းအတွက်ကြောင့် လက်ရှိစာချုပ် သက်တမ်းမှာ တစ်နှစ်ခွဲသာ ကျန်ရှိတော့သလို၊ ပေါ့ဘာကို စာချုပ်သက်တမ်းတိုးရန်ကိစ္စမှာလည်း အေးဂျင့်ဖြစ်သူကြောင့် အဆင်ပြေဖွယ်မရှိချေ။

လိုက်ပ်ဇစ်အသင်းနှင့် ကစားခဲ့သည့် ပွဲမတိုင်မီတွင်ပင် ပေါ့ဘာ၏ အေးဂျင့်ဖြစ်သူ ရိုင်အိုလာက ပေါ့ဘာသည် မန်ယူအသင်းတွင် မပျော်ရွှင်ကြောင်း ပြောခဲ့ဖူးပြီး မန်ယူအသင်းတာဝန်ရှိသူများက ယင်းမှတ်ချက်စကားအတွက် ဒေါသထွက်ခဲ့သည်။

ပေါ့ဘာသည် ယင်းမှတ်ချက်အပြီးတွင် လိုက်ပ်ဇစ်အသင်းနှင့် ကစားရသည့် အဝေးကွင်း၊ အရေးကြီးပွဲစဉ်၌ အရန်ခုံတွင်သာ ထိုင်နေခဲ့ရပြီး လူစားဝင်လာချိန်တွင် ဂိုးသွင်းယူနိုင်ခဲ့သော်လည်း မန်ယူအသင်းသည် သရေဂိုးရရှိရန် မလုံလောက်တော့ဘဲ ပြိုင်ပွဲမှ ထွက်ခွာခဲ့ရခြင်းဖြစ်သည်။

ယင်းအတွက်ကြောင့် မန်ယူအသင်းကလည်း ပေါ့ဘာကို အလွတ်ထွက်ခွာခွင့်ပေးချိန်အထိ စောင့်ရန်ထက် ရောင်းထုတ်ရန် စဉ်းစားနေသည်ဟု သိရှိရသည်။

ယခုအခါ ပေါ့ဘာ ကိုယ်တိုင်ကလည်း အသင်းမှထွက်ခွာရန် ကိစ္စအတွက် ဆိုးလ်ရှားနှင့်ဆွေးနွေးသွားရန် စီစဉ်နေသလို၊ ယခုလာမည့် ဇန်နဝါရီ အပြောင်းအရွှေ့ကာလတွင်ထွက်ခွာရန် ဆန္ဒရှိနေပြီး၊ သူ ယခင်က ကစားခဲ့ဖူးသည့် အသင်းဟောင်း ဂျူဗင်တပ်စ်သို့ ပြန်သွားဖွယ်ရှိနေသည်ဟုလည်း သတင်းများက ဆိုနေသည်။