မန်ချက်စတာယူနိုက်တက်အသင်းအသင်းနှင့် သက်တမ်းတိုးစာချုပ် ချုပ်ဆိုထားသည့် ဒင်းန်ဟန်ဒါဆန်က အသင်းတွင် ပွဲထွက်ခွင့်ရရန် အစွမ်းကုန်ကြိုးစားမည်ဟု ကြုံးဝါးခဲ့သည်။
ဒင်းန်ဟန်ဒါဆန်က လွန်ခဲ့သည့်(၅)နှစ်အတွင်း မိမိ၏လက်စွမ်းမှာ တိုးတက်လာကြောင်း၊ မန်ယူအသင်းတွင် ထိပ်တန်းဂိုးသမားများရှိပြီး ၎င်းတို့နှင့်လက်တွဲကာ အကောင်းဆုံးလုပ်ဆောင်သွားရန် မျှော်လင့်ကြောင်း၊ အသင်းအတွက် ပွဲထွက်ခွင့်ရရန် အစွမ်းကုန်ကြိုးစားသွားမည်ဖြစ်ကြောင်း ပြောကြားခဲ့သည်။
မန်ယူအသင်းသည် အသင်း၏အင်္ဂလန်ဂိုးသမားဖြစ်သူ ဒင်းန်ဟန်ဒါဆန်ကို သြဂုတ်လ(၂၆)ရက်က တစ်ပတ်လစာ ပေါင် (၁၂၀၀၀၀)ဖြင့် (၆)နှစ်သက်တမ်းရှိ စာချုပ်သစ်တစ်ရပ် ချုပ်ဆိုခဲ့ကြောင်း သိရသည်။
အသက် (၂၃)နှစ်အရွယ်ရှိ ဒင်းန်ဟန်ဒါဆန်သည် သြဂုတ် (၂၅)ရက်တွင် အင်္ဂလန်လက်ရွေးစင်အသင်း၌ ပထမဆုံးအကြိမ် ရွေးချယ်ခံရပြီး တစ်ရက်အကြာတွင် မန်ယူအသင်းက ၎င်းကို အသင်းတွင် ၂၀၂၅ ခုနှစ်၊ ဇွန် (၃၀)အထိ ရှိနေမည့်စာချုပ်သစ်ကို ချုပ်ဆိုခဲ့ခြင်းဖြစ်သည်။
ဒင်းန်ဟန်ဒါဆန်သည် ၂၀၁၁ ခုနှစ်တွင် ကယ်လိုင်းအသင်းမှ မန်ယူသို့ ရောက်ရှိလာခဲ့ပြီး တိုးတက်မှုရှိစေရန်အတွက် ၂၀၁၅ မှစတင်ကာ အသင်းငယ်များသို့ အငှားချခံခဲ့ရသူဖြစ်သည်။
၎င်းသည် ၂၀၁၈-၁၉ နှင့် ၂၀၁၉-၂၀ ရာသီများတွင် ရှက်ဖီးယူနိုက်တက်အသင်းတွင် အငှားသွားရောက်ခဲ့ပြီး လက်စွမ်းပြနိုင်ခဲ့သဖြင့် မန်ယူအသင်းက မြင့်မားသည့်လစာငွေပေးချေကာ စာချုပ်သစ် ချုပ်ဆိုခဲ့ခြင်းဖြစ်သည်။
ဒင်းန်ဟန်ဒါဆန်၏လစာမှာ လီဗာပူးလ်ဂိုးသမား အယ်လစ်ဆန်(တစ်ပတ်လစာ ပေါင် ၉၀၀၀၀)၊ မန်စီးတီးဂိုးသမား အီဒါဆန် (တစ် ပတ်လစာ ပေါင် ၆၅၀၀၀)တို့ထက် ပိုများနေသည်။
မန်ယူအသင်းတွင် စပိန်ဂိုးသမား ဒီဟေးယားနှင့် အာဂျင်တီးနားဂိုးသမား ရိုမဲရိုးတို့ရှိနေသည့်အတွက် ဒင်းန်ဟန်ဒါဆန်အနေဖြင့် ပွဲထွက်ခွင့်ရရန် ရုန်းကန်ရဖွယ်ရှိနေကြောင်း ဗြိတိန်မီဒီယာများက ဖော်ပြခဲ့ကြသည်။
