ချယ်လ်ဆီးနည်းပြ ပိုချက်တီနိုက မစ်ဒယ်ဘရော့အသင်းအား ရှုံးနိမ့်ခဲ့ခြင်းမှာ အသင်းတိုက်စစ်ပိုင်း အဆုံးသတ်အားနည်းမှုကြောင့်ဖြစ်သည်ဟု ပွဲအပြီးတွင် ညည်းတွားပြောကြားခဲ့သည်။
ချယ်လ်ဆီးအသင်းသည် လိဂ်ဖလားဆီမီးဖိုင်နယ်ပထမအကျော့ပွဲစဉ်တွင် လိဂ်ချန်ပီယံရှစ်ကလပ် မစ်ဒယ်ဘရော့ အသင်းအား အဝေးကွင်း၌ (ဝ-၁) ဂိုးဖြင့် ရှုံးနိမ့်ခဲ့ခြင်းဖြစ်သည်။
ချယ်လ်ဆီးအသင်းသည် အဆိုပါပွဲစဉ်တွင် မစ်ဒယ်ဘရော့အသင်းကို ဘောလုံးပိုင်ဆိုင်မှုအသာစီးဖြင့် ကစားနိုင်ခဲ့သလို၊ ဂိုးကန်သွင်းခွင့် (၁၈) ကြိမ် ရရှိခဲ့သည်။ သို့သော် ဂိုးပေါက်တည့်မှု (၅)ကြိမ်သာရှိခဲ့ပြီး အပိုင်ဂိုးရနိုင်သည့် အခွင့်အရေး (၂) ကြိမ်ကိုလည်း တိုက်စစ်ကစားသမား ပါလ်မာက ဖြုန်းတီးခဲ့သည်။
ထို့ကြောင့် ယင်းပွဲအပြီးတွင် ချယ်လ်ဆီးနည်းပြ ပိုချက်တီနိုက တိုက်စစ်ပိုင်း အဆုံးသတ်အားနည်းမှုကို အပြစ်တင်ခဲ့ခြင်းဖြစ်သည်။ ပိုချက်တီနိုက “ကျွန်တော်တို့ ဂိုးသွင်းနိုင်တဲ့ အခွင့်အရေးတွေများစွာရခဲ့ပေမဲ့ ဂိုးရအောင် မစွမ်းဆောင်နိုင်ခဲ့ပါဘူး။ ဒါက ဘောလုံးပါပဲ။ ဒီပွဲရလဒ်အတွက် ကျွန်တော်တို့ စိတ်ပျက်ပါတယ်။ ဒါပေမဲ့ ဒုတိယအကျော့ ကစားဖို့ ကျန်သေးတာပါ။ စတမ်းဖို့ဒ်ဘရစ်ချ်မှာ မိနစ် (၉၀) ကစားရဦးမယ်။ ဒါကြောင့် ကျွန်တော်တို့ အပြုသဘောဆောင်ဖို့ လိုပါတယ်”ဟု ပြောကြားခဲ့သည်။
ချယ်လ်ဆီးနှင့် မစ်ဒယ်ဘရော့တို့၏ လိဂ်ဖလား ဆီမီးဖိုင်နယ် ဒုတိယအကျော့ပွဲစဉ်ကို ဇန်နဝါရီ (၂၃)ရက်တွင် ချယ်လ်ဆီးအိမ်ကွင်း စတမ်းဖို့ဒ်ဘရစ်ချ်၌ ကစားမည်ဖြစ်သည်။
