ချယ်လ်ဆီးနည်းပြ ပိုချက်တီနိုက မစ်ဒယ်ဘရော့အား ဂိုးပြတ်အနိုင်ရသည့်ပွဲတွင် အသင်းတောင်ပံကစားသမား မူဒရစ်အား လူစားလဲခဲ့ခြင်းမှာ အနီကတ်ထိမည်စိုး၍ဖြစ်ကြောင်း ပွဲအပြီးတွင် ရှင်းလင်းပြောကြားခဲ့သည်။
ပြီးခဲ့သည့်အင်္ဂါနေ့က ကစားခဲ့သည့် လိဂ်ဖလား ဆီမီးဖိုင်နယ် ဒုတိယအကျော့ပွဲစဉ် ချယ်လ်ဆီး (၆-၁) မစ်ဒယ်ဘရော့ပွဲ ပထမပိုင်းအပြီးတွင် ချယ်လ်ဆီးနည်းပြ ပိုချက်တီနိုသည် အသင်းတောင်ပံကစားသမား မူဒရစ်ကို မာဒူအေကေနှင့် လူစားလဲခြင်းဖြစ်သည်။
ပွဲအပြီးတွင် သတင်းထောက်တစ်ဦးက မူဒရစ်အား လူစားလဲခြင်းမှာ ဒဏ်ရာကြောင့်လားဟု မေးမြန်းခဲ့ရာ ပိုချက်တီနိုက “မဟုတ်ပါဘူး။ တကယ်လို့ မစ်ဒယ်ဘရော့နဲ့ပွဲကို ခင်ဗျား ကြည့်နေမယ်ဆိုရင် ပွဲချိန် (၁၂) မိနစ်မှာ သူ အဝါကတ်စထိခဲ့တာကို ခင်ဗျား သိမှာပါ။ ပြီးတော့ ပထမပိုင်းပြီးခါနီးမှာ သူ့ရဲ့ကစားပုံက ရဲတင်းလွန်းပြီး ပြိုင်ဘက်ကစားသမားကို ထိမိလုနီးပါး ဖြစ်ခဲ့ပါတယ်။ တကယ်လို့ ပြိုင်ဘက်ကိုသာ ထိခဲ့မယ်ဆိုရင် သူ့အနေနဲ့ ဒုတိယအဝါကတ်အပြခံရပြီး အနီကတ်နဲ့ အထုတ်ခံရမှာပါ။ ကျွန်တော်တို့အနေနဲ့ သူ့ကို စွန့်စားပြီး မသုံးချင်ပါဘူး။ ဒါကြောင့် ပထမပိုင်းအပြီးမှာ သူ့ကို ကျွန်တော်တို့ လူစားလဲခဲ့တာပါ။ မလိုအပ်တဲ့ စွန့်စားမှုတွေကို ကျွန်တော်တို့ မလုပ်ချင်တာလည်း ပါပါတယ်” ဟု ပြောကြားခဲ့သည်။
