အမေရိကန် မေဂျာလိဂ်ကလပ် အင်တာ မိုင်ယာမီအသင်းပူးတွဲပိုင်ရှင် ဒေးဗစ်ဘက်ခမ်က ကမ္ဘာကျော် အာဂျင်တီးနားလက်ရွေးစင်တိုက်စစ်မှူး မက်ဆီအား ခေါ်ယူခဲ့ခြင်းမှာ အမေရိကနှင့် မေဂျာလိဂ်ပြိုင်ပွဲအတွက် ၎င်းတို့ပြန်လည်ပေးအပ်သည့် လက်ဆောင်ဖြစ်ကြောင်း AFP သတင်းဌာနနှင့်ပြုလုပ်သည့် အင်တာဗျူးတွင် ပြောကြားခဲ့သည်။
နာမည်ကျော် အင်္ဂလန်ဘောလုံးသမားဟောင်း ဒေးဗစ်ဘက်ခမ်သည် ပရော်ဖက်ရှင်နယ်ကစားသမားဘဝမှ အနားယူပြီးနောက် ၂၀၁၈ ခုနှစ်တွင် အမေရိကန်စီးပွားရေးလုပ်ငန်းရှင် မားစ်ညီနောင်နှင့်အတူ အင်တာမိုင်ယာမီအသင်းကို စတင်ထူထောင်ခဲ့ခြင်းဖြစ်သည်။
ဒေးဗစ်ဘက်ခမ်သည် အင်တာမိုင်ယာမီအသင်း၏ ပူးတွဲပိုင်ရှင်ဖြစ်သလို အသင်းဥက္ကဋ္ဌအဖြစ်လည်း ဆောင်ရွက်နေသူဖြစ်သည်။ အင်တာမိုင်ယာမီအသင်းသည် ပြီးခဲ့သည့်ဇွန်လတွင် PSG အသင်းနှင့် လမ်းခွဲခဲ့သည့် အာဂျင်တီးနားလက်ရွေးစင်အသင်းခေါင်းဆောင် မက်ဆီအား ဥရောပထိပ်တန်းကလပ်များ၊ ဆော်ဒီကလပ်များနှင့်အပြိုင်ကမ်းလှမ်းကာ ပြောင်းရွှေ့ကြေးအလွတ်ဖြင့် ခေါ်ယူခဲ့ခြင်းဖြစ်သည်။
AFP နှင့်ပြုလုပ်သည့် အင်တာဗျူးတွင် မက်ဆီအား အင်တာမိုင်ယာမီအသင်းထံသို့ ခေါ်ယူနိုင်ခဲ့ခြင်းအပေါ် လက်ရှိအချိန်အထိ မယုံလောက်အောင် ဖြစ်နေသေးကြောင်းလည်း ဒေးဗစ်ဘက်ခမ်က ဝန်ခံပြောကြားခဲ့သည်။
ဒေးဗစ်ဘက်ခမ်က “တစ်စုံတစ်ဦးက ကျွန်တော့်ဘက်ကိုလှည့်ပြီး အင်တာမိုင်ယာမီအသင်းမှာ မက်ဆီ ကစားနေတယ်လို့ ပြောလာမယ်ဆိုရင်တောင် ဒါကိုယုံဖို့ ခက်ခဲနေ ဦးမှာပါ။ ကမ္ဘာ့အကောင်းဆုံးကစားသမားတစ်ဦးကို အသင်းပိုင်ရှင်တစ်ဦးအနေနဲ့ ကိုယ့် အသင်းကို ခေါ်ယူနိုင်တဲ့အပေါ် ကျွန်တော် အရမ်းဂုဏ်ယူပါတယ်။ လီယို (မက်ဆီ) ကို အမေရိကန်ခေါ်ဖို့ အမြဲတမ်းအိပ်မက်မက်ခဲ့တာပါ။ သူဟာ အင်တာမိုင်ယာမီအတွက်တင်မကဘဲ အမေရိကနဲ့ မေဂျာလိဂ်ပြိုင်ပွဲ တစ်ခုလုံးအတွက် ကျွန်တော်တို့ပေးတဲ့ လက်ဆောင်ဖြစ်ပါတယ်။ မက်ဆီလို ပွဲအဖြေကိုပြောင်းလဲနိုင်သူ၊ မျိုးဆက်သစ်တွေကို စိတ်ခွန်အားပေးနိုင်သူမျိုး မရှိပါဘူး။ ဒါကြောင့် လီယိုကို ကျွန်တော်တို့အသင်းဆီ ခေါ်ယူခဲ့တာပါ။ ကျွန်တော်တို့အနေနဲ့ မေဂျာလိဂ်ချန်ပီယံဆုကို ရယူချင်သလို၊ ပြိုင်ပွဲမှာ အကောင်းဆုံးအသင်းလည်း ဖြစ်ချင်ပါတယ်။ ဒါပေမဲ့ မက်ဆီကို ခေါ်ယူခဲ့တာကတော့ အမေရိကက ကလေးတွေ ဘောလုံးကစားလာဖို့အတွက် စိတ်ခွန်အားရစေချင်လို့ပါ”ဟု ပြောကြားခဲ့သည်။
အသက် ၃၆ နှစ်အရွယ်ရှိ မက်ဆီသည် ဆော်ဒီလိဂ်မှ ကမ္ဘာ့စံချိန်တင်လစာဖြင့် ကမ်းလှမ်းမှုကို ပယ်ချကာ အင်တာမိုင်ယာမီသို့ ပြောင်းရွှေ့ခဲ့သူဖြစ်သည်။ ၎င်းသည် အင်တာ မိုင်ယာမီအသင်းအတွက် ပြိုင်ပွဲစုံ ၁၄ ပွဲကစားရာတွင် ၁၁ ဂိုးသွင်းယူထားကာ အသင်းနှင့်အတူ လိဂ်ဖလားရရှိထားပြီး ယင်းမှာ အင်တာမိုင်ယာမီအသင်းသမိုင်းတွင် ပထမဆုံးဆုဖလားအဖြစ် မှတ်တမ်းဝင်ခဲ့သည်။
