အာဂျင်တီးနားနည်းပြစကာလိုနီကမက်ဆီနဲ့ ဒီမာရီယာနေရာတွေဟာအစားထိုးဖို့ ခက်ခဲတယ်လို့ ဝန်ခံပြောကြားလိုက်ပါတယ်။ ဒီမာရီယာကတော့ ကိုလံဘီယာကို ၁-၀ နဲ့အနိုင်ရရှိခဲ့တဲ့ ကိုပါအမေရိကဖလားဖိုင်နယ်ပွဲအပြီးမှာအာဂျင်တီးနားအသင်းကနေအနားယူခဲ့ပါတယ်။
ရီးရဲလ်စတားဟောင်းဟာ ၂၀၂၁ ကိုပါအမေရိကဖလားချန်ပီယံဖြစ်တုန်းကအာဂျင်တီးနားအသင်းအတွက် အရေးပါတဲ့သူအဖြစ် စွမ်းဆောင်ပေးနိုင်ခဲ့တာဖြစ်ပြီးအနိုင်ဂိုးကိုသွင်းယူပေးနိုင်ခဲ့ပါတယ်။
ဒါ့အပြင် ၂၀၂၂ ကမ္ဘာ့ဖလားရယူနိုင်ခဲ့ရာမှာလည်းနိုင်ငံအသင်းအတွက် စွမ်းဆောင်ရည်ကောင်းတွေပြသနိုင်ခဲ့ပါတယ်။
၂၀၂၄ ကိုပါအမေရိကချန်ပီယံဖြစ်ခဲ့ပြီးနောက် စကာလိုနီကဒီမာရီယာရဲ့စွမ်းဆောင်ရည်ကိုချီးကျူးပြောကြားခဲ့ပါတယ်။စကာလိုနီကဒီမာရီယာကို ၂၀၂၆ ကမ္ဘာ့ဖလားအပြီးမှ အနားယူဖို့ ပြောကြားခဲ့ပေမယ့် ကစားသမားကိုယ်တိုင်ကကိုပါဖလားရယူအပြီးမှာတင် အနားယူခဲ့တာဖြစ်ပါတယ်။
“သူတို့ မက်ဆီနဲ့ ဒီမာရီယာနေရာတွေကအစားထိုးဖို့ ခက်ခဲပါတယ်။ သူတို့ကတကယ့်အစားထိုးမရတဲ့ကစာသမားတွေပါ။ ဖြစ်နိုင်ချေအလွန်နည်းပါတယ်။
မက်ဆီနဲ့ ဒီမာရီယာတို့ကတကယ့်ဂန္ထဝင်တွေပါ။ ဒီမာရီယာနေရာဆိုရင်လည်းအခုကြည့်ရင် မြင်နိုင်ပါတယ်။ သူ့နေရာမှာအစားမထိုးနိုင်သေးပါဘူး။ သူကတောင်ပံ ၂ ဖက်စလုံးမှာကစားနိုင်ပါတယ်။
ကျွန်တော်တို့ သူ့လိုကစားသမားမျိုးရှာမရသေးပါဘူး။ တစ်ဦးချင်းအနေအထားမှာလည်းဒီမာရီယာကအရမ်းကောင်းတဲ့ကစားသမားပါ။
အသင်းကိုပြောင်းလဲရမယ်လို့ပြောနေတာမဟုတ်ပါဘူး။ ဒါပေမယ့် ဒီမာရီယာမရှိတော့တာကအနည်းငယ်တော့ ခက်ခဲစေပါတယ်”လို့ စကာလိုနီကပြောကြားခဲ့ပါတယ်။
မက်ဆီကလည်းမကြာခင်မှာဒီမာရီယာနောက်ကိုလိုက်ဖွယ်ရှိနေပြီးလာမယ့် ၂၀၂၆ ကမ္ဘာ့ဖလားအပြီးမှာအနားယူဖွယ်ရှိနေပါတယ်။အာဂျင်တီးနားအသင်းဟာ ၈ ပွဲကစားအပြီးမှာ ကမ္ဘာ့ဖလားဝင်ခွင့်အတွက် ထိပ်ဆုံးကဦးဆောင်နေပါတယ်။ လာမယ့်အောက်တိုဘာလမှာအာဂျင်တီးနားအသင်းဟာဗင်နီဇွဲလား ၊ ဘိုလီဗီးယားတို့နဲ့ရင်ဆိုင်ရမှာဖြစ်ပါတယ်။
