ဘိုင်ယန်မြူးနစ်အသင်း၏ နည်းပြဖြစ်သူ ဟန်ဆီဖလစ်ခ်က မိမိတို့အသင်းသည် ဘာစီလိုနာအသင်းနှင့်ကစားမည့်ပွဲစဉ်အတွက် မက်ဆီတစ်ဦးတည်းကို အာရုံစိုက်ကစားသွားမည်မဟုတ်ကြောင်း ပြောကြားခဲ့သည်။
ဘာစီလိုနာအသင်းသည် ယခုရာသီတွင် ရလဒ်ဆိုးများကြောင့် ဖိအားများရှိနေပြီး၊ ဝေဖန်မှုများကိုခံနေရသော်လည်း မိမိတို့အသင်းကို ဒုက္ခပေးနိုင်သည့်အသင်းအဖြစ် ယုံကြည်နေကြောင်းလည်း ဖလစ်ခ်က ပြောကြားခဲ့သည်။
ဟန်ဆီဖလစ်ခ်က ”ဘာစီလိုနာကိုအမြဲတမ်း လေးစားခဲ့သလို မျိုးပဲ အခုအသင်းကိုလည်း လေးစားပါတယ်။ လီယွန်နယ်မက်ဆီက သူတို့အတွက် အရေးကြီးတဲ့ကစားသမားပါ။ ဒါပေမဲ့ ကျွန်တော်တို့က သူတစ်ဦးတည်းကို အာရုံစိုက်ရမှာမဟုတ်ပါဘူး။ ဘာစီလိုနာအသင်းမှာ ကျွန်တော်တို့အသင်းထက် ပိုအဆင့်မြင့်တဲ့ကစားသမားတွေ ပိုမိုပါဝင်နေပြီး၊ အားလုံးက ကျွန်တော်တို့ စောင့်ကြည့်ရတဲ့သူတွေ ဖြစ်ပါတယ်”ဟု ပြောကြားခဲ့သည်။
ဟန်ဆီဖလစ်ခ်သည် ချယ်လ်ဆီးအသင်းနှင့်ကစားခဲ့သည့် ပွဲနှင့်ပတ်သက်၍လည်း ”ကျွန်တော်တို့ နိုင်ပွဲဆက်မှုကို ထိန်းထားချင်တဲ့အတွက် နိုင်ပွဲဆက်အောင် ကြိုးစားခဲ့ပါတယ်။ ချယ်လ်ဆီးက အသင်းကောင်းတစ်သင်းဖြစ်ပြီး တိုက်စစ်ပိုင်းမှာ အရမ်းမြန်တဲ့ ကစားသမားတွေရှိပါတယ်။ ဒါပေမဲ့ ပွဲကို ထိန်းချုပ်နိုင်ခဲ့ပြီး ပထမနာရီဝက်က အကောင်းဆုံးပါပဲ”ဟု ပြောကြားခဲ့သည်။
