ဘာစီလိုနာအသင်းနှင့်လမ်းခွဲခဲ့ပြီဖြစ်သည့် တိုက်စစ်မှူး မက်ဆီသည် PSG အသင်းသို့ ရောက်ရှိနိုင်ကြောင်း ပြောကြားခဲ့သည့်အတွက် PSG အသင်း၏ပရိသတ်များစွာက နှစ်ရက်ဆက်တိုက် စောင့်မျှော်ခဲ့ကြကြောင်း သိရသည်။
မက်ဆီသည် ဘာစီလိုနာအသင်းနှင့် နောက်ဆုံးသတင်းစာရှင်းလင်းပွဲကို တနင်္ဂနွေနေ့နေ့လယ်ပိုင်းက ပြုလုပ်ခဲ့ပြီး PSGအသင်းသို့ ရောက်နိုင်သည်ဟု တရားဝင်ပြောကြားခဲ့ခြင်းဖြစ်သည်။
ထို့ကြောင့် ယင်းနေ့တွင်ပင် PSG အသင်းနှင့် အပြောင်းအရွှေ့ဖြစ်မြောက်နိုင်ကြောင်း သတင်းများလည်း ထွက်ပေါ်ခဲ့သည်။
ယင်းနောက်တွင် PSG အသင်းပရိသတ်များသည် ပါရီလေဆိပ်နှင့် အသင်း၏ကွင်းအနီးစုရုံးကာ မက်ဆီ ရောက်ရှိလာမည်ကို စောင့်မျှော်ခဲ့ခြင်းဖြစ်သည်။
ထို့ပြင် တနင်္လာနေ့တွင် အဆိုပါနေရာများ၌ လာရောက်စောင့်မျှော်သည့်ပရိသတ်များ ပိုမိုများပြားလာခဲ့ပြီး မက်ဆီအနေဖြင့် ဘာစီလိုနာတွင်ရှိနေဆဲဖြစ်ကြောင်း ခိုင်လုံသည့်သတင်းများ ထွက်ပေါ်လာမှသာ လက်လျှော့၍ အိမ်ပြန်သွားခဲ့ကြကြောင်း သိရသည်။
PSG အသင်းသည် မက်ဆီကို ခေါ်ယူရန်အတွက် ကစားသမားနှင့်တိုက်ရိုက်ဆွေးနွေးခြင်းမပြုဘဲ မက်ဆီ၏ ဖခင်၊ ၎င်း၏ရှေ့နေများနှင့် ဆွေးနွေးညှိနှိုင်းမှုများ ပြုလုပ်နေကြောင်း သိရသည်။
