မက်ဆီ လက်ဆွဲမနှုတ်ဆက်ခဲ့ဆိုသည့်သတင်းများကို မာနိုလက်စ် ဖြေရှင်း

ပြီးခဲ့သည့် ဘာစီလိုနာနှင့် နာပိုလီတို့၏ ချန်ပီယံလိဂ်ရှုံးထွက်(၁၆)သင်းအဆင့် ဒုတိယအကျော့ပွဲစဉ်ပြီးဆုံးချိန်တွင် မက်ဆီသည် နာပိုလီနောက်ခံလူ မာနိုလက်စ်၏ လက်ဆွဲနှုတ်ဆက်ရန်ကြိုးပမ်းမှုကို ငြင်းဆန်ခဲ့ကြောင်း သတင်းများထွက်ပေါ် ခဲ့ပြီး ယင်း သတင်းများအား မာနိုလက်စ်က ဖြေရှင်းခဲ့သည်။

စပိန်မီဒီယာများက မာနိုလက်စ်သည် ရိုးမားအသင်းတွင် ကစားခဲ့စဉ်က မက်ဆီနှင့် အငြိအစွန်းများ ရှိခဲ့ဖူးသောကြောင့် ပြီးခဲ့သည့်ပွဲတွင် မက်ဆီသည် မာနိုလက်စ်ကို ပွဲပြီးဆုံးချိန်၌ လက်ဆွဲနှုတ်ဆက်ခဲ့ခြင်း မရှိကြောင်း ဖော်ပြခဲ့သည်။

လူမှုကွန်ရက်တွင် ပျံ့နှံ့နေသည့် ရုပ်သံမှတ်တမ်းများအရ လက်ပတ်နာရီဝတ်ဆင်ထားသည့် လက်တစ်ဖက်သည် မက်ဆီကို နှုတ်ဆက်ရန်ကြိုးပမ်းခဲ့သော်လည်း မက်ဆီက ငြင်းဆန်နေကြောင်း မြင်တွေ့ရသည်။

မာနိုလက်စ်က ”တစ်ခုခုရေးတော့မယ်ဆိုရင် ခင်ဗျားတို့အနေနဲ့ ဓာတ်ပုံတွေကို သေချာကြည့်သင့်ပါတယ်။ လက်ပတ်နာရီဝတ်ပြီး ဘောလုံးကစားတဲ့သူမျိုး ကျွန်တော် တစ်ခါမှ မမြင်ဖူးပါဘူး”ဟု ပြောကြားခဲ့သည်။

ဘာစီလိုနာနှင့် နာပိုလီတို့၏ ချန်ပီယံလိဂ်ရှုံးထွက် (၁၆)သင်းအဆင့် ဒုတိယအကျော့ပွဲစဉ်ကို တူရကီကွင်းလယ်ဒိုင် ဂျက်ကစ်က တာဝန်ယူခဲ့ပြီး မက်ဆီ၏ သွင်းဂိုးတစ်ဂိုးအား ပယ်ဖျက်ခဲ့သည်။

မက်ဆီသွင်းယူခဲ့သည့် ဒုတိယဂိုးကို ဂျက်ကစ်က VAR ဖြင့်ပြန်လည်ကြည့်ရှုပြီးနောက် လက်ထိဘောအဖြစ် သတ်မှတ်ခဲ့သဖြင့် မက်ဆီ ဒေါသပေါက်ကွဲနေခြင်းဖြစ်ကြောင်း သိရသည်။