ဘိုင်ယန်မြူးနစ်အသင်းကွင်းလယ်လူ သောမတ်စ်မူလာသည် ဘွန်ဒစ်လီဂါချန်ပီယံဆုကို (၁၁)ကြိမ်မြောက်ရရှိသည့်ပထမဆုံးကစားသမားအဖြစ် စံချိန်တင်ခဲ့ကြောင်း သိရသည်။
ဘိုင်ယန်မြူးနစ်အသင်းသည် ပြီးခဲ့သည့် ဒေါ့မွန်အသင်းနှင့်ပွဲစဉ်တွင် (၃-၁)ဂိုးဖြင့် အနိုင်ရရှိပြီးနောက် ဘွန်ဒစ်လီဂါချန်ပီယံဆုကို (၁၀)ရာသီ ဆက်နှင့် (၃၂)ကြိမ်မြောက်ဆွတ်ခူး နိုင်ခဲ့သည်။
၂၀၀၈-၀၉ ရာသီမှစတင်၍ ဘိုင်ယန်မြူးနစ်အသင်းတွင်ကစားခဲ့သူ သောမတ်စ်မူလာသည် ၂၀၀၉-၁၀ ရာသီ၌ ဘွန်ဒစ်လီဂါချန်ပီယံဆုကို ပထမဆုံးအကြိမ် ဆွတ်ခူးနိုင်ခဲ့ပြီး ၂၀၁၂-၁၃ ရာသီမှ လက်ရှိရာသီအထိ ဘိုင်ယန်မြူးနစ်၏ (၁၀)ရာသီဆက် ဘွန်ဒစ်လီဂါချန်ပီယံအောင်ပွဲတွင် အဓိကကစားသမားအဖြစ် အသုံးတော် ခံနိုင်ခဲ့သည်။
သောမတ်စ်မူလာက “စံချိန်တင်ချန်ပီယံဖြစ်ဖို့ဆိုတာ ကျွန်တော်တို့ရဲ့ ရည်မှန်းချက်ဖြစ်ပြီး အခုအရာအားလုံးက အံ့အားသင့်စရာဖြစ်လာပါပြီ။ ချန်ပီယံဆုကို (၁၀)ရာသီဆက် ဆွတ်ခူးနိုင်တာဟာ ပျင်းရိစရာမဟုတ်ဘဲ ထူးခြားကြီးမြတ်မှုပါပဲ။ ကျွန်တော်တို့ လိုချင်စိတ်သာပြင်းပြမယ်ဆိုရင် နှစ်တိုင်း ရရှိနိုင်ပါတယ်” ဟု ပြောကြားခဲ့သည်။
